Departamento di Impuesto ta hayando e simannan aki ciudadanonan hopi preocupa si nan ta bay haya boet pasobra nan no a alcansa pa entrega nan declaracion di Impuesto prome cu dia 1 di december.
Vocero di departamento di Impuesto Meverly Romano ta bisa cu dia 1 di december tabata e termino legal pa entrega e declaracion di impuesto. E tabata un termino di dos luna pa haci entrega di e compromiso legal y ciudadano aki. E ta declara cu nan clientenan no mester ta preocupa , ya cu nan no ta bay haya boet pasobra e fecha di entrega di e formulario aki a wordo extendi.
No mester entrega formulario pa extension
Sra. Romano ta informa cu departamento di Impuesto a dicidi di duna un extension of prolongacion di termino, caminda nan clientenan cu no a entrega dicho formulario dia 1 di prome ultimo, no mester ta preocupa. Automaticamente e departamento aki ta registra den nan sistema di inkomstenbelasting cu nan clientenan ta haya un periodo di seis luna mas di tempo. E deadline awor ta bira 1 di juni 2017.
E otro inkietud cu e departamento aki ta hayando di nan clientenan ta si nan mester entrega un carta pa pidi oficialmente pa prolongacion di e termino cu a vence. Riba e punto aki, sra. Romano a laga sa cu nan clientenan no mester manda carta pa pidi pa prolongacion pa entrega nan declaracion di impuesto, ya cu e departamento aki ta registra esun cu no a entrega ainda automaticamente den nan sistema pa entreg’e prome cu 1 di juni proximo.
Di otro banda sra. Romano kier recorda cu departamento di Impuesto ta mantene e maneho cu esunnan cu ta entrega nan declaracion prome ta esunnan cu nan ta procesa prome. Esaki kiermen cu si un cliente ta sperando placa di belasting bek, y e ta entrega su formulario laat, e por spera cu nan formulario lo wordo procesa entre esunnan ultimo.
