Manera a keda conoci, for di 8.30 di mainta e portanan di e ballroom di hotel Ritz Carlton a habri pa ricibi ciudadanonan cu kier haya nan vacuna contra Covid-19, asina a indica departamento di Salud Publico mediante un conferencia di prensa.

Chris Goedhart persona cu ta coordina e programa di vacunathon a splica cu te 4.30 di atardi di ayera diadomingo mas di 2.000 persona a haya nan vacuna contra Covid-19 loke por compronde cu nan a logra e meta di vacuna entre 2.000 pa 2.500 persona, e mayoria di nan a wordo vacuna cu nan prome dosis, asina mes el a informa cu un 85% di esunnan cu a yega na hotel tabata muchanan mayor di 12 aña cu tambe tabata kier haya nan vacuna.

“Nos ta contento cu muchanan a bin cu nan mayornan pa asina vacuna y aumenta e grado di vacunacion den e grupo aki cu ta basta abou”, Goedhart a expresa.

Den potretnan por a mira cuanto hende tabata para den rij y algun di nan bou un solo basta fuerte pa asina nan por wordo inmunisa, cu mas o menos 134 stoel paden di e ballroom Goedhart a menciona cu nan tabata purba di haci e proceso lo mas lihe posibel pa asina e personanan no warda asina hopi den solo.

Cu un cantidad suficiente di enfermero, dokternan y personal di logistica pa por atende e personanan, Goedhart a bisa cu nan tambe a haya apoyo di dokternan di cas, AZV, SVb, Witgele Kruis pa asina por cumpli cu e obhetivo.

Tambe Goedhart a comenta cu e diferencia di e vacunathon aki cu esunnan anterior tabata pa motibo cu nan tabatin mas luga como prikpost na otro districtonan y tambe nan tabata dispone di mas personal pero door cu e demanda pa vacuna a cuminsa baha nan a elimina algun prikpost.

Aworaki cu e demanda a subi back nan ta kere cu esey tin di haber cu diferente medidanan cu a wordo tuma y cu variante di Delta ta mas agresivo, ademas “e personal cu nos tabatin antes nos no tin aworaki, nos a purba hunto cu partners pa bin cu un ekipo grandi pa yuda nos pero mas di un localidad nos no por a habri”, el a afirma.

Asina mes, el a menciona cu dia 12 di september esunnan cu a haya nan prome shoot ayera lo tin e oportunidad pa haya e di dos shoot, di mesun manera nan lo evalua den e siguiente simannan con nan por duna tur hende cu no por a yega ayera na e hotel menciona pa asina wak con duna na nan e oportunidad mas lihe posibel pa nan por haya e vacuna Pfizer of Johnson & Johnson cu tambe ta disponibel.

Tambe a trece dilanti cu e luga aki ta wordo paga pa asina por wordo utilisa e localidad pa personanan por haya nan vacuna.