E pareha De Vries a entama un caso contra Ministerio Publico (OM) su decision pa no actua contra e dump ilegal di asbest riba tereno di refineria na San Nicolas. Nan kier pa Corte Superior duna ordo pa OM cuminsa persecucion di esunnan culpabel.

Segun nan esunnan culpabel ta e doño di e tereno di refineria y/of e doño anterior (Valero) y/of esun cu ta explota e refineria (Citgo). Pero tambe nan ta menciona como complicenan e autoridadnan local y/of gobierno di Aruba.

Riba 11 di october 2016 e habitantenan a logra di haci un denuncia na polis, despues varios intento. Esaki Bon Dia Aruba tambe a publica. E denuncia tabata contra e dump di asbest cu na e momento ey ainda tabata andando riba e tereno di refineria, mas o menos 40 meter for di e curanan den Fort Heuvelstraat. Asina mes nan no a warda e asbest den un forma adecua, causando te dia di awe un peliger pa e salud di e habitantenan.

Tin un multitud di leynan penal viola den e caso aki, sinembargo Ministerio Publico ta nenga di actua y persigui esunnan culpabel, segun e keho di pareha. “OM a declara cu nan ta haya cu otro instancianan di gobierno (caminda administrativo y no hudicial), mester actua. Pero e habitantenan a bati alarma hopi biaha caba cerca e instancianan concerni. Manera brandweer, Dienst Technische Inspectie (DTI), Departamento di Naturalesa y Medio Ambiente y City Inspector¨, asina nan relato ta indica.

E habitantenan tambe a skirbi varios carta pa minister di Husticia Arthur Dowers y prome minister Mike Eman, expresando nan preocupacion. Niun di e instancianan menciona, ni e mandatarionan a actua. Mientrastanto segun nan maneho y e leynan aplicabel mester a tuma accion contra e dump. “Asina esunnan culpabel por a haci locual cu nan kier, y esaki ta locual nan a haci tambe, esta keda dump e asbest, trece bida di hende den peliger”, segun nan.

“E situacion negativo aki ta domina nos bida. Tur dia nos ta lanta cu esaki; e ta e prome cos cu nos ta mira ora habri nos cortinanan. Nos sentido ta uno di duda y di ta manca: con esaki por a sosode y kico mas nos por spera: e riesgonan pa nos salud, nos cas cu ta baha den balor”, asina e pareha De Vries ta expresa nan dolor.

E pareha ta sinti su mes bandona door di e instancianan y tambe husticia. “Nos no ta experiencia niun proteccion, al contrario mas menasa. Nos gusto di biba aki pero tambe nos gana di biba feliz den e ultimo fase di nos bida, a bay perdi.”

Reaccion minister di Husticia
Fin di aña pasa minister di Husticia Arthur Dowers a manda un carta pa e habitantenan cu a base di informacion for di su departamento DTI, nan a dera e asbet segun normanan internacional. Sinembargo no ta existi normanan internacional. Den e carta ta admiti si cu tabata falta di comunicacion cu e habitantenan durante e actividadnan di asbest pero cu nan a haci tur cos pa proteha e bisindario.

Bon Dia Aruba a skirbi varios biaha den pasado cu a base di e permiso Hindervergunning, e dump di asbest no ta permiti. Y cu defacto e dump ta ilegal. Ora di acerca minister Dowers over di carta, e mandatario no tabata sa di e existencia di e carta. El a bay busca confirmacion na DTI, puntrando e director si e mes of e director a firma e carta. Mientras bou di e carta ta para e nomber di e minister y su firma.

Tambe el a busca contacto cu Departamento di Legislacion pa confirma e existencia di e Hindervergunning. Aki e tambe a haya confirmacion y cu e dump ta contra e permiso aki. Asina e minister  a indica cu el bay investiga e caso aki.

E habitantenan tambe a entama un caso di LAR contra e decision di minister di Husticia. Segun nan e asbest no ta dera bon, causando ainda peliger pa e salud di e habitantenan.