Un experto di Bitcoin Ruso den centro di un enfrentamento legal abarcando varios pais a ricibi sentencia na Paris di cinco aña di prison pa labamento di placa, y a ricibi orden di paga cien mil euro den multa den un caso di sospecha di fraude cu criptomoneda.
Un corte a declara Alexander Vinnik inocente di cargonan di extorsion y asociacion cu un empresa criminal, segun su abogadonan. Vinnik ta rechasa tur acusacion y su abogadonan ta evaluando un apelacion.
Vinnik, di 41 aña di edad, tambe ta busca na Merca y Rusia. E ta acusa di ta tras di un campaña di fraude di 135 miyon euro, cu a usa ransomware y e criptomoneda Bitcoin.
Fiscalnan Frances ta bisa cu Vinnik tabata un di e creadornan di un software malicioso yama ‘Locky’ cu tabata entrega via email. Si download esaki, e data di e recipiente tabata cifra (encrypted) y tabata pidi nan pa paga un rescate den bitcoin pa liber’e.
Un serie di atakenan asina riba negoshi y organisacionnan Frances entre 2016 y 2018 a conduci na 20 victima pagando e demanda di rescate den bitcoin, un di e criptomonedanan mas usa, mediante BTC-e, un di e intercambionan di moneda digital mas grandi di mundo.
Durante su huicio, e principal linea di defensa di Vinnik tabata cu e ta solamente un operador tecnico ehecutando instruccionnan di directornan di BTC-e.
E corte a condena Vinnik di labamento di placa pero no a haya suficiente evidencia pa conden’e pa extorsion, y a keda leu di e termino di 10 aña di prison y multa di 750mil euro cu fiscal a solicita.
Un di su abogadonan Frances, Ariane Zimra, a bisa cu su condena pa labamento di placa ‘no tin sentido’, argumentando cu criptomoneda no ta considera legalmente como ‘placa’.
A aresta Vinnik aña pasa durante un vakantie na Grecia, y a trasferi e na Francia e aña aki.
