Ciudadano preocupa pa su salud ta solicita DIMAS aproba su permiso

Den edicion di Bon Dia Aruba diadomingo ultimo a trece dilanti un situacion cu ta tumando luga na Departamento di Integracion, Maneho y Admision di Stranhero (DIMAS), no solamente pa inversionistanan, sino tambe pa personanan cu kier haya nan permiso.

Manera ta conoci, pa un persona stranhero por keda biba na Aruba mester cumpli cu diferente proceso pa haya un autorisacion of permiso, pa di e manera ey nan por haci nan bida na isla aki.

Na redaccion di Bon Dia Aruba a yega un e-mail di un persona di nacionalidad Colombiano cu a expresa e preocupacion cu e tin na e momentonan aki debi na su permiso di DIMAS.

Ta trata di Liz Herledy Quiroz Lopez, ken a conta cu for di cuatro aña pasa cu el a casa cu un persona Arubiano di nacionalidad Hulandes, e ta hayando problemanan na momento di renoba su permisonan pa por biba na Aruba.

Quiroz Lopez a expresa cu desde cu el a casa a bin presenta un serie di incidente. Primeramente su prome permiso a wordo nenga pa motibonan financiero, ya cu e departamento a bisa nan cu su casa, ken tambe ta su garantia riba e isla, no tabata gana lo suficiente y no tabatin un status financiero stabiel pa por firma pa Quiroz su permiso por wordo aproba.

Manera e solicitud di DIMAS ta indica, e garante mester declara cu e ta haya un entrada neto di por lo menos 50.000 florin pa aña.

“Mi tin tur mi documentacion y ademas e tin un entrada na unda ta proba cu e ta gana mas di loke nan ta pidi”, el a señala.

Cu e di dos permiso, Quiroz a menciona cu e departamento a sigura cu nan no a paga e permiso. Su caso a wordo hiba na Corte di Husticia na unda si su permiso a keda aproba. Sinembargo tin casonan cu a keda conoci cu maske Corte a dicta sentencia na fabor di e persona, e departamento no ta cumpli cu e decision.

Di loke ta trata e di tres permiso, el a conta cu nan a introduci e documentonan na luna di januari pero despues, ora pandemia Covid-19 a yega na Aruba, esey a pone cu e situacion a bira pio. E ta bisa cu e departamento a implementa un sistema nobo di traha, na unda tur cos mester bay via online, pero di e manera ey tampoco e situacion a cambia.

“Nunca nan ta contesta. For di januari nos a entrega e documentonan, y mi a haya e contesta na october” Quiroz a afirma.

Den e caso aki, tambe nan a hiba e decision cerca un hues, na unda e mesun dia nan a haya aprobacion di e departamento.

Ademas, e ta informa cu dia 28 di januari su di cuater permiso a caduca, y awor ta bibando un situacion preocupante di salud. Quiroz ta un persona di 45 aña cu tin problemanan cu su cuero, thyroid y tambe riba e parti ginecologico. “Mi preocupacion y angustia ta cu mi mester bay dokter pa motibo di salud y mi no tin seguro”, el a afirma.

Quiroz a agrega cu e luna aki e tin un cita cu un dokter specialista di dermatologia, pa via cu el a haya hongo segun su dokter di cas na algun partinan di su curpa for di seis luna pasa y cu dia pa dia ta birando pio, pa loke e dokter a recomenda pa e por bishita un specialista.

“Dia 18 di e luna aki mi tin e cita cu specialista y mi ta bay perde e cita ey pa via cu mi no tin AZV”, Quiroz a menciona.

Di mesun manera, el a bisa cu ademas di dje tambe otro personanan ta pasando den e mesun situacion cu nan permiso. Aunke el a sigura cu su permiso no tin relacion cu permiso di trabao, pa motibo cu e no a solicita trabao den añanan aki.

“Pa e motibo aki mi no ta mira pakico nan ta pone tanto dificultad pa mi permisonan”, el a manifesta.

Pa finalisa di e manera aki Quiroz ta pidi pa DIMAS por tuma den consideracion su caso, mirando cu su situacion di salud por bira pio y por trece consecuencianan grave p’e y su famia.

Di otro banda, na luna di december ultimo, DIMAS a duna di conoce algun cambio importante pa loke ta trata admision di personanan stranhero pa motibo cu e pandemia di Covid-19 a laga un crisis economico na e pais.

Nan a informa cu desde e momento ey, a keda suspendi tur peticion pa loke ta trata e prome permiso; te un proximo aviso no lo otorga permisonan laboral, cu excepcion di esunnan cu ta wordo categorisa como inmigrante di conocemento: personanan cu tin cierto experticio of un funcion clave den algun sector; inversionistanan y esunnan cu ta traha na sector como agricultura moderno, piscamento y cria.

E prolongacion of renobacion di permisonan ta keda limita. Personanan cu tin menos di cinco permiso por renoba, pero den caso cu e mercado laboral ta permiti esey y si nan tin un documento positivo na DPL. Un cambio di firma tampoco lo keda posibel.

E regla principal ta indica cu un stranhero cu ta solicita un prome permiso lo mester warda e contesta di esaki den exterior. E regla aki ta sigui vigente pero tin algun cambio den dje.

Igualmente, e departamento a indica cu e peticion di reunificacion familiar a keda suspendi. Reunificacion familiar a base di e prome permiso no lo wordo otorga te proximo aviso, cu excepcion si e garante ta considera como Arubiano, tin un firma liber, si a wordo naturalisa, si tin un permiso laboral cu ta wordo considera como vital importancia pa e pais, den casonan aki si lo por extende e reunificacion familiar.