Un empresario di nacionalidad Israeli, Gil Shavit a ser deteni na Lima – Peru, pa supuestamente participa den e sistema di soborno di e empresa di Brasil Odebrecht hunto cu Felix Moreno, gobernador di Peru na aña 2015, medionan local a informa.
E detencion di Shavit a sucede diadomingo anochi na momento cu polis a drenta su cas na Lima y na cas di Moreno tambe situa na varios distrito di capital di Peru, informacion a keda confirma pa fiscalia di Peru.Segun informacion Shavit a colabora na momento cu a facilita e soborno di 4 miyon dollar cu Odebrecht a entrega na Moreno, pa construccion di e caretera di Costa Verde na Callao, na aña 2014.
E obra tabatin un presupuesto original di 302 miyon di sol (92 miyon dollar) y na 2015 a crece cu 90 miyon sol (27miyon dollar) mas, cu tabata financia entre gobierno central y regional di Callao, corant La Republica a informa.
Shavit ta un empresario cercano na Josef Maiman, amigo di ex-presidente Alejandro Toledo (2001-2006) cu ta parce como testaferro (representante) di e ex-presidente segun investigacion di fiscalia. Investigacion ta revela tambe cu Shavit y Maiman a faborece un empresa den un negoshi di benta di arma di candela tambe, Alvaro Vargas Llosa, ex-asesor di campaña di Toledo na 2001 a splica.
Toledo ta investiga pa fiscalia pa un supuesto soborno di 20 miyon di dollar cu Odebrecht a duna na Peru, y pa asina haya contrato pa e construccion di dos tramo di e caretera Interoceanico Sur. Fiscal Hamilton Prado a dirigi e revision hudicial den diferente cas na Lima, Peru. Moreno y Shavit ta bao investigacion pa trafico di influencia y labamento di placa.
