“A-B- C, spell e Aruba ta e isla cu mi stima” mi ta canta bay scol. E cantica di Ir-Sais, Rocco y Dando cu ta honra e tres islanan Caribense ta unico cu ta lanta mi energia den e dia shinishinan aki. Pero bon mi hendenan, ban papia pasobra mi tin poco redo!
Un poco mas di e racismo “casual” cu ta pasa na Hulanda. Mi amiga ta traha na un bistro na centraal y e ta conta mi cu un homber Hulandes di alta edad a bin cumpra te. E manera cu e bistro ta traha, ta cu nan ta sirbi e cliente awa cayente y nan mes tin cu kies e te y traha esaki na un bar patras. Wel, ora mi amiga a splica esaki na e homber e di “ay, unda e dianan ey cu nos tabata tin hende preto pa haci tur cos pa nos”. Mira ki! Mi amiga a tuma e cup di su man y bisa “ Sorry meneer, akinan nos no ta sirbi racista”. Su colega para banda di dje, a bisa e “Bo a scucha mi colega, please bay”. Wowo habri mi tabata scucha mi amiga e redo, boso por kere? Den pleno 2017 hende ta bisa algo asina? Den hende? Ay no, dios tata.
Mi tabata hopi orguyoso cu mi amiga a stop e homber di biaha si. Y mas ainda pasobra mi amiga ta un muhe blanco, pues mi ta haya great di su parti cu e ta tuma e lucha contra racismo asina na pecho. Pero esaki ta djis un di e miles incidentenan cu ta pasa tur dia. Pa dia internacional di hende muhe mi mester a bay filma na un studio cu un otro muhe Hulandes, aparentemente tabata tin un problema cu un sombra y e luz den e studio ora “casualmente” e guy cu tabata yudando nos set up tur cos a bira wak e otro muhe y bisa “Ja, maar die kroes haar help egt niet”.. Insinuando cu mi cabey ta e problema. Henter dia mi tabata papia Ingles, pues e lo a asumi cu mi no lo comprende. Pero ya, ami no a bay reclama ni haci problema. Na final di dia, mi cabey ta fabuloso y esun di dje tabata parce cabey di un cacho muha pues esey ta tristo suficiente.
Awo, bek na universidad cosnan ta turbulento. Tin mal vibes den klas y grupitonan cu ta kere nan tin 15 y ta sinta haci problema unda no tin. E semester aki nos ta haya entre otro Change Management, Organisational Behavior y un curso cu yama “Global Citizenship”. Mas tanto, pa Global Citizenship nos tin cu explora un pais y nan cultura pero tambe reflexiona riba nos mes y con nos ta fit e concepto di ta un ciudadano “global”. Awo den klas e meneer ta puntra mi si mi ta identifica cu e termino di “Global Citizen” pa cual mi ta splic’e absolutamente cu no. Aunke pa definicion, esaki ta un persona cu ta papia hopi idioma, cu ta biaha, tin compasion, comprension pa otro ser humano y tambe ta rabia cu cosnan inhusto cu ta pasa rond di mundo. Mi ta bisa mi meneer cu e termino ta politicamente corecto y cu e hendenan cu ta claim e titulo aki, hopi biaha no tin hendenan cu ta oprimi na pecho.
Pues pa mi e termino aki ta puro elitismo y e tin un vibe negativo cu ne. Mi no kier wordo yama un ciudadano “global”, pasobra den wowo di hopi mi nunca lo ta un. Sin importa con hopi mi sa. Mi ta splica e meneer esaki e ta keda wak mi atento. Global Citizenship for what? For who? Pakico? Mi ta bin di un pais unda hende ta warda añanan largo pa un visa y nunca ta logra sali. Nos tur sa cu tur cos ta “globalisando” pero esaki ta beneficia ken? Tur kier diversidad, pero nan kier esaki di berdad? Ata nan a eligi Trump. E kier pone tur e Americanonan prome.
E berdad ta, cu tur hende kier ta den e circulo aki, tur hende kier ta un ciudadano “global”. Pero wak nos mes hende Caribense ta papia yen idioma, ta crece den yen cultura mas sinembargo nos ta bay Hulanda y tog nan ta trata nos manera cu nos ta menos. Mas mi papia, mas tur hende den klas ta wak mi straño, excepto e guy Colombiano cu tabata identifica cu mi y sa precisamente kico mi kiermen. El a remarca “Ya, bay bisa na Colombia cu bo ta un ciudadano global, podise nan lo hari bo”. Nos sa masha bon, pa ken e termino aki ta reserva. Poco dia despues, nos tabata tin e mesun meneer atrobe y el a bisa mi “Danki pa locual bo bisa tocante Global Citizenship biaha pasa den klas, e tabata refrescante tende bo punto di bista” Wel, mi ta contento cu el a bay cas y keda pensa riba locual mi a remarca. Ey mi hendenan, mi ta cambiando bidanan akinan yiu. Ambiente!
