Un siman atras nos a conta experiencia di un ciudadano cu a bolbe for di Europa, kende a ser poni den cuarentena. Awe nos ta follow-up cu e persona, kende a conta nos un tiki con su experiencia den cuarentena ta bay.
E persona a papia bou condicion anonimo mirando cu ta un tema sensitivo. Mientras e cantidad di caso na Aruba ta aumenta, asina tambe ta aumenta e miedo y preocupacion entre nos poblacion. Durante conferencia di prensa diario di gobierno y crisis team, varios biaha ta puntra pa informacion na ki luga e casonan positivo ta, y unda e hende den cuarentena ta situa.
E persona aki a conta nos cu e siman aki su cuarentena ta termina, y e no a presenta ningun sintoma.
“Un siman despues cu mi a yega, mi a ricibi un yamada di DVG. Nan a puntra con mi ta sinti y a duna instruccion pa reporta cualkier sintoma si esaki presenta. Ademas nan a splica cu mi mester yama e ultimo dia di mi cuarentena, pasobra nan no sa ki medida lo por cambia pa e momento ey.”
Mirando cu e persona aki no tabata den contacto directo cu un persona cu a test positivo pa COVID-19, e no ta cay den e maneho pa haci test pa e coronavirus. E mester djis warda su cuarentena na cas.
“Mi ta djis keda den mi camber henter dia sin sali niun caminda. Mi ta keda sin contacto significativo cu esunnan rond di mi”, e persona a destaca.
