Den e edicion di Bon Dia Aruba di ayera a publica un articulo tocante e rescate di cuater baby shoco cu tabata den peliger despues cu nan neishi a ser destrui pa un of otro motibo. Tabata danki na e accion rapido di comunidad riba rednan social cu Aruba Conservation Foundation a yega na e sitio y rescata e shoconan baby for di peliger.

Manera ya caba Bon Dia Aruba a reporta ayera despues cu un ciudadano preocupa a publica algun potret riba Facebook den cual el a indica cu cuater shoco baby tabata riba un caminda di santo pa motibo cu nan neishi a ser destrui. Ciudadanonan a mobilisa rapidamente riba rednan social y a logra alerta Aruba Conservation Foundation (AFC) tocante e situacion.

ACF a yega na e sitio y a logra rescata e cuater shoco baby for di peliger. Durante investigacion a constata cu den cercania tabatin dos neishi, un cu tabata intacto y un cu tabata destrui. No ta conoci kico precies a pasa cu e neishi, pero e hecho ta cu el a ser destrui y e shoconan tabata sin cas. E otro neishi den cercania tabata intacto y despues di haci un evaluacion ACF a tuma decision pa pone e shoconan baby cerca di e neishi nobo pa wak si nan ta tum’e.

Te cu ayera tardi e shoconan tabata explorando e area cerca di e cas mientras nan mayornan, e mama y tata di e shoconan chikito tabata observa desde un distancia. ACF a laga un camara special durante henter anochi pa monitor e progreso y desaroyo.

Awe mainta e fundacion a regresa na e sitio y ultimo actualisacion cu Bon Dia Aruba a ricibi for di e representante di e fundacion ta cu e cuater shoco baby ta den e neishi of ta haci uso di neishi mientras cu nan mayornan ta sigui observa desde un distancia. Te cu ayera merdia e mayornan no a bay cerca e shoconan ainda.

ACF lo sigui monitor e situacion, pero ya a yega e punto cu naturalesa ta tuma su curso natural back y no tin mester di mucho intervencion di hende mas. E shoconan a haya un neishi nobo y e mayornan lo mester sa di cuida nan 4 baby.

Danki na e articulo aki otro ciudadano preocupa a tuma contacto cu mesa di redaccion di Bon Dia Aruba pa trece dilanti un situacion cu ta involucra un cas di shoco cerca di su cas cu segun e ciudadano aki su opinion, por ta den peliger.

E ciudadano preocupa a splica cu dilanti di su cas, cu ta situa na Turibana, tin un cas di shoco cu e ta tira bista riba dje pa sigura cu tur cos ta cana bon y cu e shoconan no ta ser molestia. El a indica cu tin algun compania di tour pa turista tabata usa e cas di shoco como un atraccion, cual tabata preocupa e ciudadano aki.

El a sigui splica cu di su propio iniciativa el a tuma contacto cu algun di e companianan di tour aki pa yega na un acuerdo pa nan no sigui haci uso di e cas di shoco como un atraccion of para cerca di e cas pa molestia e shoconan.

Un di e companianan cu segun e ciudadano a indica cu no tabata kier coopera na bienestar di e shoconan tabata e compania ABC Tours. Segun e persona aki el a reuni cu e tour operatornan, pero e compania aki no kier a reuni of coopera.

Bon Dia Aruba a tuma contacto cu e compania en cuestion, ABC Tours, y un representante di e compania a splica cu ora ta trata e shoconan, nan ta na altura y ta consciente cu ta bestianan protegi. E representante di e compania a indica cu nan tour guides ta core riba e ruta en cuestion pa hopi aña caba y ta trata di un caminda publico.

El a indica cu nan ta na altura cu tin un cas di shoco riba e caminda aki, pero a enfatisa cu na ningun momento nan ta baha pa mishi cu e cas di shoco, of ta para den cercania di e cas di shoco cu por causa un molester. El a remarca cu e tour guides ta simplemente apunta den direccion di e cas di shoco mientras nan ta core riba nan ruta, y ta purba di hasta no pita pa no haci mucho desordo pa no molestia e shoco.

Segun e representante di e compania en cuestion nan ta dispuesto pa traha hunto pa yega na un solucion na bienestar di e shoconan den caso cu e shoconan ta den peliger di berdad.

Di parti di Aruba Conservation Foundation (ACF), e representante di e fundacion a splica cu na momento cu cualkier persona ta wak un shoco of cualkier otro bestia endemico y nativo mes den peliger, por tuma contacto cu e ACF Wildlife Hotline pa reporta esaki. Rangers di e fundacion encarga cu e area ey lo bay wak kico e situacion ta y di eynan ta depende si e shoco ta den peliger of no.

El a remarca cu esaki ta situacionnan cu e fundacion ta encontra tur dia, pero cierto casonan so ta haya atencion, manera por ehempel e caso di neishi di shoco na Bushiri cu a haya atencion pa motibo cu tabatin un evento. Pa e fundacion esaki ta situacionnan lamentabel pasobra mesun situacion cu a sucede na Bushiri e fundacion ta encontra tur caminda rond di e isla pasobra e shoconan ta ser cori di nan cas, pero no ta haya e mesun atencion.

Aruba Conservation Foundation ta enfoca riba bestianan endemico den peliger y e ACF Wildlife Hotline ta netamente pa yuda e bestianan aki cu ta den peliger. No ta pa animalnan domestico of exotico cu ciudadanonan tin na cas. E liña di telefon aki ta berdaderamente pa e shoconan, cascabel, prikichi, lora, entre otro bestianan endemico y nativo.