Recientemente Bon Dia Aruba a publica un articulo tocante dentista cu no tin permiso trahando na Aruba. Un persona a acerca Bon Dia Aruba pa splica cu el a bay drecha su djente na un dentista sin permiso pa spaar placa y e trabou a sali caro.

E persona, cu a prefera di keda anonimo, ta splica e no kier otro persona pasa den loke el a pasa aden pa su ‘ignorancia, y no kier a paga di mas na un dentista local’. Segun e ta comparti cu el a paga Afl 100.- pa drecha un buraco cu e dentista sin permiso a bis’e cu tin recuperacion.

“El a bisa mi cu ta djis un buraco y cu si mi yen’e, e dolor y problema ta kita. Despues di un tempo, di algun siman, e dolor a cuminsa bek. Mi a prefera di wanta, te cu el a bira pio y mi a bolbe cerca dje. Claro el a trata cune bek, pero nunca el a drecha”, el a expresa.

Segun e persona, el a perde confiansa anto el a dicidi di bay su mesun dentista local, pa motibo cu no tabata wanta e dolor, y e dentista sin permiso no por a haci nada mas p’e, pasobra no tabata tin e ekipo adecua, ni por a traha bon cune.

Ora el a yega su dentista local, esaki a splik’e kico tabata e situacion di e persona su djente. El a saca su potret y asina el a splica detayadamente kico tabata e problema di e pashent. Pa motibo cu el a laga tempo pasa, e mester a pasa den e proceso di ‘root canal’.

Sinembargo, e persona a splica cu e root canal a sali 6 biaha mas caro di loke el a paga na cuminsamento cu e otro dentista. “Ami tabata kier a salba e djente, pasobra mi sa cu e root canal, e djente por bira debil y cay den cualkier momento. Pero pa motibo di no a bay dentista local, mi a sali ta perde toch.”

A papia cu dentista local Leonardo Maduro, kende a splica e proceso di e root canal. El a splica cu cada proceso tin nan complicacion. Un root canal por kibra e djente, deshidrata of bira debil, pero tambe e por dura mas di 5 pa 10 aña si tin bon cuido. Anto si e pashent no tin placa pa haci un implante, e mester sigui cu e proceso.

Ta depende na cada persona, sinembargo si por scapa e djente natural ta bon. Tin dentista cu ta duna opcion pa pone un ‘bridge’ of otro opcion pa e djente. Tambe el a splica cu e prijs di e proceso di root canal por varia depende di e cantidad di raiz, tambe ta recomenda pa pone un corona.

“E prijs ta varia, tin 500, 600, 1.000 florin, anto e corona ta un 2.000 florin mas. Den comparacion cu implante, cu ta sali un 3.000 pa 4.000 florin, pues no ta core riesgo cu ta kibra y tin garantia. Sinembargo esey no ta nifica cu no por haya malesa, mester keda haci check up”, Maduro a splica.

Segun e pashent, su iresponsabilidad a sali mas caro. El a remarca cu mas el a warda, e gasto a bira mas halto. E ta recomenda pa tur hende cu sinti un dolor of algo straño bay di biaha su dentista.

“Ami a bay, pero a sali mas costoso pa mi ignorancia di bay prome na un dentista cu no tabata bon ekipa. Den mi caso, mester a perde mi djente pasobra el a yega e nervio. Unabes mi mester yega e proceso di root canal mi a perde caba”, el a expresa.

Sinembargo, e ta remarca cu cada hende tin e derecho di busca locual ta cumbini nan. Aunke e ta agrega cu ‘logicamente e no ta sigur’. E pashent ta bisa cu tambe a bay haci test di sanger pa evita cualkier otro malesa, pasobra el a keda preocupa si e ekipo tabata bon sterilisa of sigur.

Pa finalisa, e persona a expresa cu tin biaha, hende ta pensa pa spaar placa ta haci cosnan sin pensa riba e consecuencia, pero mester corda cu ‘nos salud ta algo delicado’.