(AP) — Un ciudad na Kentucky a bin cu un campaña pa promove turismo: Bureau di Convencion y Bishitantenan di Lexington a usa un laser infrared pa manda un mensahe den espacio pa invita biaheronan extraterestre.
“Prome cos cu bo ta bay nota mientras bo ta descende door di atmosfera di Tera den Centro di Kentucky ta e paisahenan berde cu ta rondona e centro di ciudad vibrante di Lexington. Esey ta nos famoso bluegrass,” e mensahe ta cuminsa. E ta continua describiendo e seronan gentil, criadero di cabay y bourbon, prome cu sugeri lugarnan unda pa keda, come y haci compras.
E idea pa e campaña a bin despues di revelacionnan recien di UFO y avancenan den creacion di imagennan di espacio profundo cu a duna impulso na e creencia cu nos no ta nos so den universo, segun e bureau di bishitante a bisa den un declaracion e luna aki na momento di anuncia e campaña.
E agencia a bisa cu a traha cu cientifico y academiconan pa manda e mensahe den direccion di planetanan potencialmente habitable den sistema solar TRAPPIST-1, como 40 aña luz leu di nos. E esfuerso tabata lidera pa nativo di Lexington, Robert Lodder, kende ta un experto den ingenieria di computer, astrobiologia y Buskeda pa Inteligencia Extraterestre.
“Nos a trece hunto expertonan den ingenieria, linguistica, medionan digital, filosofia y ciencia ficcion pa diseña, debati, y transmiti e mensahe,” el a bisa den e declaracion.
A manda e mensahe cu aprobacion di FAA y e tin un imagen bitmap codifica.
“E imagen bitmap ta e clave pa henter e cos,” experto di linguistica, Dr. Andrew Byrd a bisa. “Nos a inclui imagennan representando e elementonan di bida, nos seronan iconico di Lexington, y e structura molecular di awa, bourbon y hasta dopamina… pasobra Lexington ta fun!”
Sinembargo, por dura un bon tempo prome cu haya un contesta. E agencia a bisa cu ta bay dura 40 aña pa e mensahe yega su destino y por dura otro 40 aña prome cu por ricibi un contesta.
Mientras tanto, e agencia a bisa cu biaheronan terestre tambe ta invita pa bishita.
