(EFE) – E ciudad Colima, na estado di e mesun nomber, pa di dos aña consecutivo ta lider cu 140.32 homicidio pa cada 100.000 habitante den e Ranking 2023 di e 50 ciudad mas violento na mundo, segun Conseho Ciudadano pa Siguridad Publico y Husticia Penal a sigura.
“Pa di shete aña consecutivo, un ciudad Mexicano ta e mas violento na mundo. Na 2023, e ciudad di Colima tabata esun mas violento igual cu na 2022,” Jose Antonio Guerra, presidente di e organismo a indica den un conferencia di prensa na Ciudad di Mexico. E di dos ciudad mas violento tambe ta Mexicano, Ciudad Obregon, na estado di Sonora, cu 117,83 asesinato pa cada 100.000 habitante.
Na 2023, shete di 10 ciudad mas violento na mundo tabata Mexicano: Colima, Ciudad Obregon, Zamora, Manzanillo, Tijuana, Zacatecas y Ciudad Juarez.
Den sentido ey, Ortega a resalta cu “Mexico ta e pais cu e number mayor di ciudadnan violento,” cu 16 di 50 ciudad cu por lo menos 300.000 habitante den e rapport mas reciente.
“Ta algo basta grave y ta un refleho di violencia cu nos ta bibando na e pais,” el a bisa.
Den e top 10 di ciudadnan mas violento tambe ta Port Principe na Haiti, Guayaquil na Ecuador y Mandela Bay na South Africa.
E paisnan mas afecta pa via di violencia ta Haiti, Ecuador y Mexico.
Homicidionan na Mexico a disminui un 4.18% na 2023 hasta 29.675, e di cuatro aña consecutivo di disminucion despues di e añanan mas violento den historia cu tabata 2019 y 2020 cu mas di 34.000 victima di asesinato cada un, ambos bao e mandato di Andres Lopez Obrador, segun datonan di Gobierno.
Mientras, na 2023 a drenta den e lista e ciudadnan Brasileño di Caruaru, Macapa y Porto Velho, e Colombiano Barranquilla y Sincelejo, Washintong na Merca y Port Spaña na Trinidad y Tobago.
