(BBC) – Ciudad di Rosario ubica na 300 kilometer di Buenos Aires, na provincia di Santa Fe, ta e di tres ciudad mas grandi di Argentina y durante decadanan tabata conoci pa ta e cuna di algun figuranan mas destaca di historia di Argentina, awor ta conoci como esun di mas peligroso na e pais.

Violencia a aumenta den ultimo dianan cu asesinato di un hoben trahado di un stacion di gasolin, dos taxista y un chauffeur di bus, tur di nan a muri door di tironan causa pa sicarionan.

Tin varios rapport cu ta mustra cu Rosario tin e tasa mayor di homicidio na Argentina.

Na 2023, Centro di Estudionan Latinoamericano riba Insiguridad y Violencia di Universidad Tres de Febrero a determina cu na 2020 tabatin 16,4 persona asesina pa cada 100.000 habitante.

Ta trata di un cifra superior na esun di Buenos Aires, Villa del Retiro, na unda e number di mortonan violento tabata di 12,9 e mesun aña.

Segun Observatorio di Siguridad di empresa Verisure, den ultimo aña Rosario tambe tabata e ciudad cu mas hechonan di delincuencia a registra na e pais.

Tras di e lamentabel cifranan aki, ta sconde un delito cu a converti e bida di e habitantenan den un nightmare, narcotrafico.

Segun e periodista di La Nacion, German de los Santos, Rosario tin “un tasa di homicidio cuatro biaha mayor cu e promedio nacional” debi na “lucha entre gruponan pa control di trafico di droganan na e ciudad.”

Un negoshi violento di e dealernan genera pa e hecho cu Rosario ta e waf principal agro-exportado di Argentina, ta strategicamente ubica den un di e principal canal di transporte na e pais. Hidrovia Paraguay-Parana, cu ademas di transporta soya y otro productonan, tambe ta utilisa pa contrabanda droga, den particular cocaina, cu destino Europa y Oceania.

“Tin mas di 20 waf den area, loke ta converti Rosario den un ciudad unda droga por circula facilmente. Esey a haci impulso pa e lucha di control di trafico pa benta interno,” De los Santos a señala.

Pero su ubicacion no ta e unico motibo cu ta splica di pakico Rosario tin un problema cu narcotrafico hopi mas grave cu otro ciudadnan Argentino, incluyendo e barionan mas pober di provincia di Buenos Aires, e zona cu mas poblacion na e pais.

Segun e periodista di e coran Clarin, Virginia Messi, tampoco esey ta debi na “volumen di droga cu ta move riba cayanan.”

Pa Messi, Rosario ta “un anomalia narco” debi na “violencia extremo” cu esnan cu ta den microtrafico ta eherce y e “descontrol” cu ta existi, “cu mas di 30 grupo” operando y extorsionando, maske nan lidernan ta deteni.

Mientras tanto, Rosario a cay den un “bataya caotico” teritorial entre e gruponan aki, cu apoya pa organisacionnan grandi ta lucha pa controla un bario of un zona puntual pa microtrafico, segun un investigacion haci pa Ministerio Publico di Santa Fe a haci na 2022.

E enfrentamentonan aki ta loke a multiplica e mortonan, segun e rapport ta indica.

Debi na e ultimo sucesonan, gobierno nacional a pone den marcha un comite di crisis y a anuncia cu lo manda Forsanan Arma pa Rosario pa duna nan sosten logistico y tactico di tur forsa federal cu ta operando caba.