A pesar cu e trabou di rehabilitacion di e refineria no ta den full swing ainda pa falta di financiamento internacional di e compania Citgo afilia na PDVSA (Venezuela), e compania aki ta cumpliendo debidamente cu e pago di salario di nan trahadonan y afilia na e sindicato IOWUA.
Presidente di IOWUA, Boy Anthony a declara na Bon Dia Aruba cu nan ta bayendo bon, aunke e falta di mas trahado ta uno evidente. El a splica cu nan tin 25 trahado na servicio di Refineria di Aruba (RdA), y e compania estatal aki ta paga nan. Mientras cu e otro grupo di trahado di e terminal, Citgo ta percura pa nan salario.
No ta asina cu RdA ta pagando e trahadonan di refineria cu ta traha pa Citgo. “No ta asina. Nos ta traha directamente cu Citgo”, e ta bisa. Logicamente ya cu nan ta traha den e terminal, ya cu nan ta haya e jet fuel, diesel y gasolin cu ta bin via barco, nan ta traha estrechamente cu e trahadonan di RdA door di e compania FMSA (Fuel Marketing & Supply Aruba) cu ta distribui e combustibel rond di Aruba . Pero RdA y Citgo cada un tin un maneho riba nan mes pa asunto di pago di nan trahadonan.
Pago y mas trahadonan
Te awor den pago Citgo ta cumpliendo cu e trahadonan. E ta reconoce cu ora cu tin cambio di un doño di trabou pa otro doño di trabou, semper tin algun impasse chikito. “Pero di tur manera nan (Citgo) ta cumpli cu e pago y RdA tambe ta cumpli cu e pago. Kiermen mi no wak niun problema te awor riba pagamento pa viola e CAO”, segun sindicalista Anthony. Riba e parti aki semper tin “cos chikito” cu nan por drecha ariba mesa.
E terminal cu ta den man di Citgo tin un grupo di alrededor di 30 trahado na servicio di e compania aki mes. Nan a tene e grupo di trahado aki pa mantene e terminal, pero mientras tanto e personal ta limita y pa colmo uno a bay, pasobra e no por haci e trabou mas.
Proceso pa restart ta bay ‘hopi slow’
“Kiermen nos falta hende pero e ta bay”, e ta bisa. E ta haya cu e proceso di tuma mas trahado ta bayendo poco poco. Tanten tin indicacion cu nan kier start mas lihe di loke ta plania locual ta demanda cu mester tuma mas trahado pa turn around e refineria, pero e proceso aki ta bayendo hopi slow. E no ta kere cu di e forma aki nan por logra e meta di restart e refineria mas lihe posibel.
IOWUA ta representa actualmente un grupo di 55 trahado ariba 300 cu nan tabatin prome cu Valero a stop. Nan ta representa directamente e trahadonan cu ta traha cu e refineria of tin algo di haber cu e refineria; pero no e contratistanan.
