Durante un ceremonia, tanto representantenan di Gobierno di Aruba, CITGO Aruba Refining, Petróleos de Venezuela, S.A. y partnernan tecnico a firma varios acuerdo di proyecto importante. Entre e acuerdonan tabata tin e ‘Acuerdo di Servicio’ di contratista principal di e proyecto “Mehorador di Crudo Aruba” y e contracto di ‘Prestamo Puente’ diseña pa canalisa y explota e trabou di rehabilitacion planea pa e refineria di Aruba situa na San Nicolas.
E meta di e acuerdonan ta pa percura pa e servicionan cualifica di ingenieria, compra, maneho di proyecto y di sub contratista rekeri pa e descripcion di trabou di e rehabilitacion di e refineria di Aruba. E acuerdo aki ta bay haci empleo di personal local y dunadonan di servicio local posibel. E acuerdo a keda ehecuta entre CITGO Aruba na un banda y e dunadonan di servicio tecnico Technip France y Y&V Ingenieria y Construccion como un consorcio na e otro banda.
E contracto di e ‘Prestamo Puente’ tin como meta pa percura pa e financiamento di e servicionan cu mester wordo duna bou di e ‘Acuerdo di Servicio di Contratista Principal’. E resultado di e prestamo aki ta bay wordo uza completamente pa rehabilita e refineria di acuerdo cu e plannan di proyecto estableci pa CITGO aña pasa cu trabounan enfoca riba un plan di completacion cu lo haci e refineria operacional pa di dos mita di 2018.
“E firmamento di e acuerdonan aki ta un paso importante den direccion di restart e refineria mirando cu nos lo intensifica actividadnan di inspeccion y ta prepara pa cuminsa actividadnan di rehabilitacion”, tabata palabranan di Jose Pereira, presidente den funcion y CEO di CITGO Petroleum Corporation y Director di CITGO Aruba Holding, LLC. “Drentando den e siguiente fase di e proceso di rehabilitacion e comunidad bisiña por spera di wak mas actividad den e refineria cu lo resulta den mas oportunidad pa trabou pa e isla den e lunanan nos dilanti.”
