Citgo y gobierno di Aruba a firma un ‘Heads of Agreement’. Esaki prome minister Mike Eman a anuncia awenochi hunto su colega ministernan Mike de Meza y Paul Croes.
E forma di anuncia a trece hopi speculacion cu a logra un acuerdo riba e apertura di e refineria na San Nicolas. Pero a resulta cu esaki ta nada mas cu un paso mas cerca den e negociacionnan entre e partidonan. “Ainda ta falta hopi detaye”, asina minister De Meza ta bisa. Conseho di minister a tene un reunion di urgencia prome cu a anuncia e resultado na prensa.
Un ‘heads of agreement’ ta un documento cu no ta mara niun partido pero si ta clarifica e topiconan principal cu finalmente mester conduci na e acuerdo final. Esaki gobierno ta spera fin di maart, pa prome pasa parlamento pa aprobacion. Pa por ehecuta e ‘heads of agreement’ mester hinca esaki prome den un contracto aproba pa ambos partido.
