Un presentacion cu a lanta hopi expectativa cerca e participantenan di e evento anual di ATIA, tabata esun di Sr. Alirio Zambrano kende a wordo nombra como director di e proyecto Citgo Aruba. E expectativa tabata grandi, ya cu e gremio empresarial y comercial asocia na ATIA tabata kier sa mas di Citgo Aruba su compromiso economico social cu nos pais.
Zambrano a gradici ATIA y e comunidad comercial en general, y a introduci CITGO Aruba, entre otro splicando cu e ta un compania Arubiano, cu lo sigui e reglanan di e pais Aruba. Igualmente e compania aki tambe ta pertenece na PDVSA den un manera indirecto, ya cu ambos CITGO y PDVSA ta pertenece na PDV holding cu ta un compania localisa na Merca.
Citgo
Otro punto cu Sr. Zambrano a trece dilanti ta cu aunke CITGO Aruba ta un refineria Arubiano, e lo wordo maneha mes cos cu otro refinerianan di CITGO. Pasobra “e ta un compania altamente competitivo di complexidad halto, hopi eficiente y hopi competitivo den e mercado dificil aki”. Tur e conocemento aki segun e ehecutivo petrolero- ta loke nan ta treciendo cu CITGO Aruba. Nan ta doño di tres refineria na Merca den diferente estado nan; caminda cada estado tin diferente ley y reglanan y te hasta diferente cultura. Y a pesar di esaki nan tin exito den tur e luga nan aki, segun Zambrano. El a laga sa tambe cu Citgo tin mas di 5 mil pump station y nan tin experiencia for di procesamento di crudo te na e benta di lubricante nan.
Den su presentacion el a mustra un serie di grafica, caminda algun di nan a hala basta atencion, specialmente esunnan caminda Aruba ta aparece full cora, un color cu a crea hopi stigma asocia cu regimen socialista di Venezuela. Den e graficanan, el a remarca e punto di bista di siguridad. El a señala cu den e operacion di e refineria e balor mas importante y prioridad number uno ta salud di hende. Sr. Zambrano no a duda di bisa cu Citgo ta un lider den siguridad. El a indica e recordnan cu ta traha cu persona 100% sigur. Director di Citgo a indica cu nan ta preocupa pa siguridad y nan ta zorg pa e persona bay bek na nan cas di manera sigur como nan a bini na trabao. “Ta e manera di haci negoshi. Nos ta obsesiona cu siguridad”, el a laga sa.
Filosofia
Ambiente amigabel ta un otro filosofia cu Citgo tin, segun Sr. Zambrano. Nan ta hopi orguyoso di nan record tocante esaki y nan filosofia empresarial: “Prome siguridad, si no ta sigur nos no ta haci’e”, el a bisa. Segun director di Citgo Aruba, nan ta studia e situacion, pidi conseho y evalua si un tarea ta wordo haci tanten cu ta sigur. El a bisa categoricamente cu Aruba ta bay tin un refineria miho cu loke tabatin prome.
Pa laga un herencia segun e ehecutivo aki nan kier pa refineria di San Nicolas dura pa largo. “Nos ta den un negoshi di marathon pero nos no kier yega na nos meta den dies seconde. Nos kier core un careda di 15 kilometer. Nos ta akinan pasobra nos kier ta capaz di core un negoshi cu ganashi”, el a declara. Pero di otro banda el a trece dilanti cu den e negoshi aki, CITGO no tin un monopolio den prijsnan, ya cu esaki ta un negoshi global. E unico cos cu nan no por controla ta e costo, pues nan ta purba di haci nan miho esfuerso pa haci nan trabao di e manera mas eficiente. Semper teniendo nan filosofianan como prioridad, segun Sr. Zambrano.
Otro punto di nan filosofia empresarial ta e desempeño ambiental. Segun Sr. Zambrano nan ta extremadamente orguyoso di bisa cu nan staf na CITGO ta haltamente cualifica. “Ta maraviyoso pa tin un team tan profesional”.
Confiabilidad
Otro punto cu Sr. Zambrano a trece dilanti durante su presentacion den e evento anual di ATIA ta Citgo Aruba su compromiso cu confiabilidad. El a bisa cu nan ta run e negoshi denter di e limitenan pa cual el a wordo diseña. El a señala cu pa esunnan cu ta den e negoshi di e refineria sa kico esaki ta nifica. Tin luga nan cu persona ta pusha e trabao y tin makinaria demasiado leu. Nan no ta asina, nan kier opera denter di nan limitenan pasobra tin un 50% di chens di logr’e ora ta bay mas leu di e limitenan, pero igualmente nan lo por perde un 100%. Segun e director di Citgo Aruba nan no ta mucho pura pa yega na e meta riba e proceso aki di restart e refineria ya cu nan kier core e marathon aki safe.
Un punto cu a hala basta atencion, ya cu e refineria ta situa na Aruba y den un districto cu tin su necesidad cu ne ta e parti di e responsabilidad social di Citgo Aruba cu nos pueblo. Segun Sr. Zambrano e responsabilidad social ta e yabi di nan. Nan ta cay bou e linea di petroleo di Venezuela, unda segun e responsabilidad social ta un di e balornan mas grandi di cualkier corporacion. Den su retorica el a bisa cu ‘esaki ta un inversion den nos futuro di nos yiunan di nos amigonan. E ta un inversion den nos comunidad, e ta un vision extraordinario pero bo mester tin fe’. Ya cu nan ta trahando akinan, nan ta biba akinan, y nan ta inverti aki nan. Considerando e panorama aki tin asina hopi areanan social unda nan por participa.
Zambrano a bisa cu Citgo kier participa den educacion yudando scolnan y centronan di salud. Nan kier mira den cual area nan por duna un man, manera educacion den e area di ciencia. Ya cu e refineria aki ta haltamente compleho bo mester persona cu ta dicidi bay den careranan cu ta dificil manera scheikunde, ingenieria mecanico, procesonan, etc.y nan kier stimula nos hubentud riba e terenonan aki. “Nos kier ta dispuesto pa yuda y mustra cu cosnan por wordo logra, y bo por tin un bida exitoso”.
Tambe Sr. Zambrano a declara dilanti e invitadonan di ATIA cu e modelo di negoshi aki ta cuadra perfectamente pa Aruba, no solamente pa Citgo sino pa Venezuela. El a splica cu Venezuela tin un reserva di petroleo extra pisa masha grandi mes. Den e proceso aki pa saca e petroleo aki caminda bo mester pone un diluyente den dje cu ta parce gasolin, esey ta loke nos ta haci for di e banda Venezolano. Pero e otro proceso cu finalmente lo facilita su benta despues, refineria na Aruba lo hunga un rol fundamental.
