E presentacion di gobierno di dialuna ultimo pa informa parlamento a duna cierto contesta pero a yama tambe pregunta atrobe. Tambe pasobra te awor ningun parlamentario no a haya ningun documento pa mira ainda. Y den 2000 pagina por tin hopi detaye menos positivo scondi. En todo caso laga nos trata algun di e puntonan cu a bin dilanti durante e presentacion.
Por ehemplo: Ken ta e counterpart cu gobierno ta yama ‘Citgo’? Gobierno ta bisa cu na Merca a lanta un compania separa cu yama Citgo Aruba Holding LLC, lanta segun derecho di Delaware cu ta e compania madre di e compania Citgo Aruba Refinery NV y e otro tres NV-nan lanta na Aruba. E holding nobo aki ta 100% propiedad di PDV Holding, e compania Mericano cu ta 100% propietario tambe di Citgo Petroleum Corporation, cu ta e compania cu inicialmente gobierno di Aruba a hiba negociacion cun’e, al menos cu e parti Venezolano di e gerencia.
Esaki en berdad ta duna cierto claridad tocante e asunto aki. E ta splica e contenido di e comunicado di prensa di Citgo Petroleum Corporation di 11 di juni ultimo, unda nan ta laga sa cu no ta nan, como e compania cu ta propietario directo di e refinerianan y otro propiedad na Merca, ta e partner cu a firma. Nan no ta menciona e compania Citgo Aruba Holding LLC, pero ta bisa cu e grupo di compania na Aruba ta subsidiario di PDV Holding. En todo caso no ta e compania aki (Citgo Petroleum Corporation) cu cual gobierno a negocia tur e tempo, ta esun cu a firma cu gobierno.
Kico esaki significa concretamente? Aparentemente e preocupacion di e parti Mericano di e gerencia di Citgo Petroleum Corporation tocante e riesgonan financiero di e proyecto a haya oido cerca e doñonan Venezolano (PDVSA, gobierno Venezolano).
Ta parce cu a hiba e inversion cu mester haci na Aruba for di e compania di operacion na Merca y a pone e asunto den man di PDV Holding. Ta p’esey tambe Citgo Petroleum Corporation den e comunicado di prensa menciona por a anuncia cu nan no ta participe di e acuerdo, pero cu nan papel ta limita na duna asistencia tecnico y conseho. Tambe nan a pone bon cla cu financiamento pa e proyecto na Aruba lo mester bin di fuente externo.
Cu esey tur problema a keda resolvi? No, pasobra PDV Holding mes tambe tin su compromisonan financiero cu ta haci dificil pa nan yega na haya financiamento pa e proyecto na Aruba. E compromisonan aki ta entre otro relaciona cu e debenan grandi adkiri aña pasa, tempo cu a fia 2,5 biyon dollar na bono y prestamo pa duna PDVSA/gobierno Venezolano como dividendo.
A duna garantia special na e prestamistanan pa loke ta prestamo adicional cu otronan y a pone como garantia parti di e assets di e compania di operacion (Citgo Petroleum Corporation). Manera nos a indica caba den nos edicion di dia 17 di juni ultimo, tin duda serio si e holdingnan entre PDVSA y Citgo por genera tanto prestamo na e momento aki pa inverti den e proyecto na Aruba.
Tambe nos a publica luna pasa tocante e duda cu Standard & Poor’s a vocifera den nan ultimo rapport encuanto Aruba, cu Citgo lo por logra financiamento, mirando su profiel halto di riesgo, y ademas e situacion financiero di PDVSA y gobierno di Venezuela. Manera semper, ‘time will tell’ kico finalmente lo ta posibel pa logra financiamento. Loke no ta yuda den henter e asunto aki ta cu gobierno ta sigui papia den un forma confusivo di ‘Citgo’ dunando e impresion cu ainda e compania Mericano cu yama Citgo Petroleum Corporation ta a bordo como operador y inversionista.
Otro aspecto importante ta e acuerdo cu Valero, specificamente e aspecto di liberacion di Valero di cualkier responsabilidad pa daño ambiental. Aunke e acuerdo no ta un hecho ainda, en todo caso e idea ta pa Valero keda libra di e responsabilidad aki, a cambio di e instalacionnan completo cu ta bira propiedad di Pais Aruba. Pero di otro banda ya caba tin un acuerdo cu Citgo Aruba, cu dia yega na desmantelacion, Aruba lo ta responsabel pa 50% di e gastonan. Evaluacion di e dañonan ambiental manera nan ta awor ta bay tarda dos aña ainda, pero ya caba gobierno ta hincando nos full den compromiso di tur banda, sin cu nos tin un idea ta kico e chasco aki ta bay costa finalmente.
Conclusion: a keda bastante aspecto pa clarifica. Entre otro e asunto di e situacion den Asamblea Nacional na Venezuela unda e mayoria tin duda grave encuanto e acuerdo y ta enfatisa e posibilidad di aumenta produccion di upgrader dentro di e pais mes. Tambe e acuerdo cu Valero y su consecuencianan pa Pais Aruba.
Finalmente ta keda e problema cu gobierno ta sigui insisti cu henter e asunto aki ta carga cello di ‘Citgo’ mientras cu no ta asina. E compania di en berdad cierto renombre na Merca a percura pa e no ta parti di e riesgonan den e asunto aki.
