Citgo Aruba a comenta riba e articulo cu Bon Dia Aruba a publica riba 10 di october indicando cu ta dera sushi cu asbest awor riba e tereno di refineria banda di Fort Heuvelstraat.
Nan ta bisa cu e ‘area specifico ey di e propiedad no a wordo asigna of duna den lease na Citgo Aruba’. “E trabou ta wordo haci pa un contratista cu a keda contrata pa Valero, e operador previo di e refineria, como parti di un acuerdo cu gobierno di Aruba. E acuerdo aki a keda sera prome cu Citgo Aruba a bira e operador nobo di e facilidad.”
Tambe e compania kier informa ‘cu e trabou di asbest riba tereno di e refineria ta concerni asbest deposita pa operadornan anterior y no ta responsabilidad di Citgo Aruba’. Esaki ta locual Bon Dia Aruba tambe a skirbi. Sinembargo den un entrevista durante e inauguracion di Citgo siman pasa diabierna trahadonan a bisa nos cu nan tin un contacto cu Citgo y ta haci trabou di asbest.
Ora Bon Dia a puntra Alvin Koolman, director di Refineria di Aruba (doño di e refineria) con esaki por, el a menciona cu porta Valero a deal esaki cu Citgo. Nos a bisa tambe cu nos tabata purba di haya un aclaracion di parti Citgo riba e punto aki.
Esaki ainda nos ta buscando. Nos kier sa dicon e trahadonan e ora ta bisa cu nan ta haci e trabou como trahado di Citgo. Tambe nos kier sa mas di e pida tereno. Awor tin mas claridad riba e acuerdo entre gobierno y Citgo kico e operado ta huur. Den e area tin un dump di sushi cu asbest caba y awor trahadonan ta deshaci di mas asbest, derando esaki bou den container bou tera. Banda di esaki un landfill nobo lo bin.
Tocante e landfill aki, nos a lesa esaki den e acuerdo entre Citgo y gobierno cu Citgo lo haya permiso pa traha un landfill pa deposita sushi genera pa ‘rehabilitation and operations activities’. E ora e pregunta si e landfill nobo cerca di e dump di asbest, ta trata di e landfill aki segun e acuerdo of lo traha un otro riba tereno cu Citgo si a huur for di gobierno.
Momento Bon Dia Aruba lo ricibi e contestanan di Citgo, nos lo publica nan.
Dump di asbst ilegal ta sigui
Echo ta keda cu e dump di e asbest awor y den pasado bou di Valero ta haci ilegalmente. Manera Bon Dia Aruba a skirbi dialuna habitantenan den cercania, ta preocupa y a entrega denuncia na polis contra esaki .Sinembargo e trabou te ayera nos por mira, ta sigui. E instancianan di gobierno manera Departamento di Medio Ambiente ta na haltura pero nan no a pasa cerca e habitantenan ainda.
