E compania di refinacion Mericano Citgo Petroleum Corporation ta cortando formalmente e lasonan cu su empresa matriz, e compania petrolero estatal Petroleos de Venezuela SA (Pdvsa), pa cumpli cu e sancionnan imponi pa Estadonan Uni riba e pais miembro di OPEC, asina dos persona cerca di e decision a conta Reuters.

E ehecutivonan di e firma cu sede na Houston a establece un fecha limite, dia 26 di februari, pa termina relacion cu Pdvsa despues di e sancionnan diseña pa reduci e entradanan di petroleo pa presidente de facto Nicolas Maduro y pa apoya e gobierno di transicion lidera pa e presidente di Asamblea Nacional, Juan Guaido.

Estadonan Uni, Canada y decenas di otro nacion a reconoce Guaido como e presidente legitimo di Venezuela pero Maduro ainda ta controla ehercito, e institucionnan publico y Pdvsa, cu ta proporciona mas di 90 porciento di e entradanan di divisa for di exportacion di e pais.

Citgo a retene e pagonan na e empresa matriz, e pagonan pa servicio corporativo, y a para comunicacion electronico y e mencion di Pdvsa den material di mercadeo y riba su website.

E empleadonan Venezolano emplea na Merca cerca Citgo a bolbe Venezuela e luna aki y a cera un filial di compra cu tabata opera desde e sede di Citgo, Servicios Pdvsa, e personanan cu conoce e asunto a conta. Un portavoz di Citgo no a responde riba e solicitudnan di comentario di Reuters.

E compania ta tratando di libra su mes di e sancionnan cu a obstaculisa acceso na financiamento. Ta dunando prioridad na refinanciamento di un credito revolvente y un prestamo segun plazo pa fin di juli, e fuentenan a bisa. Dialuna pasa e firma di rating Fitch a pone Citgo bao observacion di calificacion, indicando un riesgo mas grandi pa motibo di e sancionnan. “Nan a bisa nos cu nos mester organisa cas prome cu dia 26 di februari pa evita conflicto cu e sancionnan,” un di e fuentenan a bisa.

Congreso Venezolano (Asamblea Nacional) a nombra un hunta directivo di Citgo bao presidencia di Luisa Palacios, ken siman pasa a nombra un ekipo di gerencia bao mando di Rick esser, e vice-presidente ehecutivo nobo di e compania. E hunta directivo di Pdvsa y e subsidiarionan PDV Holding y Citgo Holding, tambe a keda designa pa Asamblea Nacional di Venezuela.

Citgo ta e principal activo den exterior di Venezuela. E ta e di ocho empresa refinerador mas grandi di Merca, cu un red di refinacion di 750.000 bari pa dia, capaz di suministra 4 porciento di e combustible di e pais a traves di un red di aproximadamente 5.000 stacion di servicio den 30 estado.

Asamblea Naciona na Venezuela tabata investiga e activonan y e cuenta bancario di e nacion na henter mundo, den un esfuerso pa obtene acceso na placa y instalacionnan den exterior.

No ta cla ainda si e hunta directivo di Citgo a completa un proceso di registro na Delaware pa tuma legalmente e control di e compania. E hunta directivo nobo lo por topa un desafio legal di parti di e actual liderazgo di Pdvsa, si e hunta no a keda constitui legalmente y Pdvsa actual hiba esaki corte.

Problema di bono

Economia na Venezuela a cay dramaticamente den ultimo añanan, cu 63% di GDP desde 2016. Esaki ta solamente comparable cu Siria, cu a cay 75% desde 2010. Pero aya tin un guera civil. E caida tabata consecuencia tambe di e caida di e industria petrolero. Tur esaki tabatin consecuencia tambe pa e debenan acumula tanto di Pdvsa como di estado Venezolano. E debe externo a aumenta di alrededor di 55 biyon dollar na 2010 te na 150 biyon dollar na fin di 2018. Cu e GDP reduci, esaki ta duna un corelacion di debe/GDP di mas di 150%, cu no ta manehable.

Desde 2018 a cuminsa e problema serio di default den practicamente tur diferente bono, tanto di estado Venezuela como di Pdvsa. E unico bono cu a cumpli cu pago di interes y capital ta e Pdvsa 2020, cu ta mara na 50,1% di e accionnan di Citgo Petroleum Corporation como garantia pa cumplimento.

Esaki ta un punto serio cu e gobierno nobo lo mester tuma na cuenta. Banconan di inversion ta calcula cu un potencial restructuracion di debe di Venezuela cu un gobierno nobo cu un orientacion pro mercado, por extende pa por lo menos un aña y e inversionistanan mester anticipa un descuento di e bononan entre 50% y 70%. Es decir: un descuento hopi cerca di e valor cu e bononan tin actualmente, di como 30%. Esaki lo significa un perdida grandi pa e tenedornan di bono y ta crea un situacion unda no por spera un mehoracion tanten e mesun regimen ta goberna e pais.

Como consecuencia, Venezuela mester mira den direccion di e entidadnan multilateral y paisnan amigo ora tin un gobierno nobo. Presta placa na Venezuela y cu ta usa esaki pa lanta eeconomia y yuda reduci e crisis humanitario. Asina e tema di e debe externo no lo bira e prome prioridad, pero ta keda un peso grandi pa e pais.

NOTA DI REDACCION

Consecuencia pa Citgo Aruba?

E aspectonan trata aki riba, manera un eventual cuestionamento di nombramento di directiva pa e diferente empresanan den e consorcio, por bira importante tambe pa e situacion di e companianan Citgo na Aruba tambe. E cuatro NVnan estableci na Aruba ta subsidiario di un holding crea specialmente pa e ocasion, Citgo Aruba Holding LLC, cu tambe ta funda y residencia na Delaware, Merca, y ta un subsidiario, na su turno, di PDV Holding LLC, cu ta un filial directo di Pdvsa.

Un bataya legal tocante e legalidad di e nombramento di e directivanan di Pdvsa y sucesivamente e holdingnan na Merca, pa finalmente un corte dicidi riba e legalidad di henter e cadena di nombramento cu a tuma lugar, lo no para e operacion di e empresa na Merca, pero por significa cu adkiri financiamento externo, mientras e bataya legal ta tuma lugar, ta bira altamente improbable.

Di otro banda, e situacion dificil financiero di tanto Pdvsa como Citgo, manera ilustra aki riba pa loke ta e biyones na debe riba bono, ta haci hopi dificil pa adkiri financiamento pa un proyecto na Aruba, cu no ta sigur cu lo tin prioridad den e totalidad di inversion necesario, tanto na Venezuela como na Merca.