E 49,9% restante di e accionnan di e empresa Mericano CITGO, propiedad 100% di PDVSA, a keda hipoteca secretamente na un filial financiero di e empresa estatal Ruso Rosneft, citando un investigacion di Redd Intelligence, segun Latin American Herald Tibune (LAHT).
Bon Dia Aruba a purba di haya un reaccion for di Citgo Aruba y tambe minister di Economia, Richard Arends. Pero te ainda no a logra di haya nan pa contesta entre otro si nan ta na haltura y si esaki lo tin consecuencia pa e refineria na Aruba.
Asina a keda hipoteca 100% di e accionnan di CITGO, ya cu PDVSA a hipoteca 50,1% di CITGO Holding Inc. como garantia pa e tenedornan di bono di PDVSA, cu vencimento e aña aki, pa cambia nan pa un bono nobo cu ta madura na 2020. Den caso di incumplimento di PDVSA, e tenedornan di e bononan nobo di PDVSA pa US$ 3.400 miyon na 8.5%, lo por tuma 50.1% di Citgo Holding Inc.
LAHT ta afirma cu “Steven Bodzin, un di e principal reporteronan di investigacion na America Latina, a informa cu PDVSA, cu likidez limita, a hipoteca e 49,9% di Citgo cu Rosneft pa un prestamo di US$ 1.500 miyon”.
CITGO Petroleum Corporation ta posee oleoducto y gasoducto na Merca, como tambe e refinerianan na Corpus Christi, Texas; Lake Charles, Louisiana; y Lemont, Illinois. E refinerianan di CITGO por refina aproximadamente 749.000 bari pa dia y e refineria di Lake Charles ta e di seis refineria mas grandi di Merca. Tambe e compania tin terminal y facilidad di almacenamento di crudo y producto.
E hipoteca a keda descubri atraves di un declaracion di e entidad Uniform Commercial Code di Delaware (UCC) na fabor di Rosneft Trading SA haci pa PDV Holding Inc cu a ser descubri pa e agencia Redd Intelligence cu a difundi e noticia.
Durante e periodo di vigencia di e hipotecanan, PDVSA ta keda impedi pa eherce su propiedad di e empresa Citgo, manera dispone di su accion, bienes y activo. Cu e operacion aki 100% di Citgo ta den man stranhero mientras e hipotecanan ta vigente.
E organismo UCC ta ser usa pa proteha acreedornan y pa informa otro posible acreedor cu tin interes den e activonan di un compania.
Russ Dallen, di e Fondo de Oportunidades Venezuela, cu a yuda pa describi e hipoteca secreto, a señala cu dia 30 di November e reservanan di Venezuela a subi di repente cu US$ 891 miyon, sin cu analistanan tabata capaz di splica di unda e placa aki a sali. Pues ta pensa awor cu e suma aki lo ta e restante di e prestamo di Rosneft.
Dallen tambe a señala cu PDVSA a duna di comprende durante un conferencia telefonico cu potencial inversionista cu a participa den e cambio di bono di PDVSA 2020, cu garantia di CITGO, cu Venezuela tabata liber pa utilisa e restante 49,9% di Citgo Holding, como respuesta na un pregunta.
Dallen a señala cu e acuerdo aki a ser firma despues cu Donald Trump a keda elegi presidente di Merca.
CITGO ya ta ser demanda na Delaware separadamente pa ConocoPhillips y Crystallex bao di e Ley Uniforme di Transferencia Fraudulento di Delaware, alegando cu CITGO, PDVSA y Venezuela “a transferi fraudulentamente” US$ 2.800 miyon for di Merca pa evita miles di miyon di pago na acreedornan. E demandanan aki ta den proceso.
Nota di redaccion: No ta conoci ainda kico ta e efecto di e asunto aki pa e financiamento di e proyecto di CITGO na Aruba. Ta conoci cu algun tempo pasa Citgo Aruba Refining NV, o su compania madre, a pidi PDVSA pa un prome suma di US$ 100 miyon pa cuminsa e proyecto. No ta conoci si mientras tanto esaki a keda otorga.
