Citgo Aruba ta perde caso contra acreedor local

Corte Comun di Husticia pa e islanan Hulandes den Caribe a duna su veredicto den un caso entama pa contratista Project Management Engineering and Consultancy NV (PMEC) contra Citgo Aruba Refining NV, un di e cuatro companianan lanta pa e consorcio Mericano na Aruba, pa maneha rehabilitacion y operacion di e refineria. Ta trata di un suma di mas di Afl. 3 miyon cu Citgo ta nenga di paga argumentando cu pa via di e sancionnan Mericano nan no por cumpli cu nan obligacionnan financiero.

E companianan tabatin desde 2016 un convenio den cual PMEC tabata suministra entre otro personal, ekipo, y material pa e obranan cu Citgo tabata implementa. Na september 2018 Citgo a laga PMEC sa cu nan lo no renoba un serie di ‘purchase order’ (PO) y na november 2018 a bolbe notifica cu no lo renoba otro cantidad di PO despues di 31 di december 2018.

PMEC a cuminsa un caso sumario pa obliga Citgo paga e sumanan pendiente cu tabata acumula mas di Afl. 3,6 miyon. PMEC a perde e caso sumario y despues a apela e caso dilanti Corte. Den e caso di apelacion aki Citgo a argumenta cu nan no por haci pago na PMEC sin permiso explicito di Office of Foreign Assets Control (OFAC) e seccion di departamento di Tesoro Mericano cu ta supervisa ehecucion di e sancionnan Mericano. Citgo tabata alega, segun e sentencia, cu nan a pidi permiso pero no a haya contesta mas. Corte ta constata cu e sancionnan Mericano no ta aplicabel den e caso aki, ya cu e sancionnan tin como obhetivo pa gobierno Venezolano, e propietario di henter e consorcio di Citgo, no ta beneficia di e pagonan cu Citgo lo a haci na PMEC, al contrario. Ademas cu e diferente license cu OFAC a otorga no ta stroba pago dentro di e consorcio Citgo, segun Corte.

Decision final ta cu Corte ta haya cu Citgo no tin rason den nan ponencia cu e sancionnan ta stroba nan di paga y ta condena Citgo na pago di Afl. 3.166.055,17, mas e costonan di e proceso.

Cu e sentencia aki, na fabor di e compania local, por papia di un ‘trendsetter’ pa e demas companianan local cu ta acreedor di Citgo Aruba Refining NV. E pregunta grandi cu ta keda, sin embargo, si di berdad Citgo lo haya e recursonan for di e empresanan mas halto den e cadena di e consorcio pa cumpli cu e obligacionnan aki. Posiblemente ta bin un complicacion politico aki, ya cu henter e consorcio di Citgo, te na e holdingnan principal Citgo Holding y PDV Holding, no ta den man mas di gobierno di Nicolas Maduro, sino di e gobierno interino di Juan Guaido, cu a haya reconocimento di Hues den diferente caso den corte na Merca.