Aunke sancion di Venezuela contra Aruba no a cambia
Riba e topico di e blokeo unilateral cu e gobierno Venezolano a impone riba Aruba y otro islanan di e reino Hulandes, no tin mucho cos nobo. Ainda e blokeo ta continua aunke segun informacion cu a yega na Bon Dia Aruba, tin pasahero Venezolano cu destino Miami cu ta wordo permiti di biaha via Aruba of Corsou.
Prome Minister di Aruba, Evelyn Wever-Croes a bisa cu e sancion di Union Europeo contra halto funcionario di e gobierno di Venezuela a haci cu e relacion aki a keda ‘un poco mas bou tension’. Segun e prome mandatario e autoridad di e pais bisiña di Venezuela a keda cu e posicion cu nan kier mira cu e sancion di Union Europeo lo wordo kita prome cu nan ta yega na un areglo cu pais Aruba.
Na nivel di departamento di Asunto Exterior si tin mas contacto cu Venezuela, specialmente cu estado Falcon cu ta e estado mas cerca, segun e mandatario. E estado Venezolano aki ta esun cu tambe ta sufriendo mas bou e embargo aki. Nan ta evaluando si nan por yega na solucion riba algun di e puntonan mas cardinal of dificil.
El a bisa cu nos tin hendenan cu ta gusta bay Venezuela pa entre otro asunto di control medico y aworaki debi na e sancion di e gobierno Venezolano no ta bay. E gobierno di Aruba ta purbando na nivel di departamento di Relacion Exterior por wordo papia cierto asuntonan, pero te aworaki e relacion ta mesun cos.
A pesar di e situacion aki y considerando cu Citgo cu ta un filial di PDVSA ta encarga cu operacion di e refineria nacional na San Nicolas, e gobierno di Aruba sa cu Citgo kier pa Asdrubal Chavez (potret) kende ta presidente di Citgo awor, bin haci un bishita na Aruba. “Nos a bisa naturalmente cu e ta bon bini”, asina prome minister Wever-Croes a bisa.
Reunion den parlamento
E peticion cu a wordo canalisa cu president di parlamento pa asina nos prome mandatario encarga cu asunto di relacion exterior, por duna un splicacion riba asunto di e blokeo di Venezuela contra nos isla, pronto lo tuma luga. E mandatario ta kere cu den transcurso di otro siman e reunion lo tuma luga den parlamento.
Prome minister Evelyn Wever-Croes a declara bisando cu na prome momento e peticion aki a bini for di e fraccion di coalicion (MEP-POR-RED), aunke e siman aki durante un conferencia di prensa di e fraccion AVP, nan a laga sa cu nan a haci e mesun peticion pero te dia di awe no a wordo honra.
“Claro cu e lo wordo honra… y nos ta bay comparti informacionnan cu nan”, e prome mandatario a declara durante un conferencia di prensa diahuebs ultimo. El a agrega cu tur loke parlamento pidi nan ta haya pero e no sa si por contesta tur pregunta, esaki ta depende di e preguntanan cu nan tin.
