Na final di luna pasa, dia 29 di januari, Citgo a laga registra cuatro compania local, tur den forma di NV. E companianan ta e siguiente nan: Citgo Aruba Refining NV; KvK no. 46550; Citgo Aruba Terminal NV; KvK no. 46551; Citgo Aruba Marine Operations NV; KvK no. 46552; Citgo Aruba Sales & Marketing NV; KvK no. 46553. Como director pa tur e cuatro companianan ta actua e compania di trust IMC International Management & Trust Company NV estableci na Aruba.
Un compania segun su meta ta pa opera un refineria (Citgo Aruba Refining NV), otro pa opera e actividad di mercadeo y distribucion di combustibel na Aruba, un pa brinda servicio portuario den haf di San Nicolas y un pa opera como autoridad portuario y maneha haf, incluyendo trafico di container.
Cu Citgo a cuminsa move di e forma aki, estableciendo compania local no ta nada straño. Den pasado e traspaso a tuma luga di otro forma, tempo cu Coastal a pasa su companianan pa El Paso y esaki a pasa nan pa Valero. E companianan a haya un cambio di nomber pero e propiedadnan a keda bao di e companianan. Den e situacion actual esaki ta bay funciona un poco diferente, ya cu a anuncia caba cu Citgo no ta desea di adkiri propiedad, pero kier yega na un convenio di lease pa varios aña. Manera gobierno a anuncia e intencion ta pa lanta un compania estatal cu lo bira propietario di e facilidadnan. No ta conoci cu esey lo bay directamente, den e sentido cu e compania ta bira propietario di tur e propiedadnan, o cu e lo fungi como compania ‘madre’ pa e companianan cu awor ainda ta conoci como e companianan bao number di Valero.
E compania cu ta destina pa bay maneha e refineria tin inclui den su metanan e maneho di e area di transshipment tambe. Esaki den e caso di e compania actual di Valero (Valero Refining Company – Aruba NV) tambe ta asina.
Remarcabel ta cu Citgo a lanta tambe un compania pa mercadeo y distribuidor di combustibel na Aruba, mientras cu gobierno a bisa cu tabata busca un partner local pa tuma e parti aki cu awor ta cay bao di un compania separa di Valero. Di e registracion di un compania di Citgo pa e parti aki por comprende cu nan ta interesa pa bay haci esaki tambe. Esaki significa talbes cu e partner local cu gobierno tabatin na bista no ta interesa mas? En todo caso no lo ta asina cu e refineria, si e habri atrobe, lo bay entrega tur producto produci na Aruba mes. Sigur e gasolin y diesel lo mester bin di exterior ya cu e refineria lo no bay produci esakinan. Por ta cu den e set up manera tin esaki pensa por entrega heavy fuel oil pa WEB y jet fuel pa aviacion.
Loke ta hala atencion tambe ta e constitucion di dos compania pa maneha e haf di San Nicolas. Valero na e momento aki no conoce un compania separa pa esaki. Den e metanan di un di e companianan di Citgo (Citgo Aruba Terminal NV) ta aparece tambe asunto manera maneho di haf di e refineria como autoridad portuario. Esaki ta inclui tambe actua como agente duanero, shipbroker, ship chandler, etc. Tambe actua como estibador, forwarding agent y compania di transporte y almacenahe pa handle container den importacion y exportacion pa tercera partido. Esaki ta crea cierto asombro pasobra a scucha Prome Ministro Eman mes declara cu e intencion tabata pa mantene e papel di autoridad portuario pa Pais Aruba mes. E hecho cu e compania nobo aki ta inclui esaki den su metanan ta indica cu lo duna e autoridad portuario den man di e compania aki, cu ta prepara caba pa bay haci hasta maneho di importacion y exportacion di container pa otro compania. Te awor gobierno ningun momento a papia di e actividadnan aki na San Nicolas y hasta den pasado reciente tabata opone fuertemente e sugerencianan cu San Nicolas lo tabata un opcion hopi mas faborabel pa un haf di container cu Barcadera.
E otro compania liga na e haf ta esun cu lo maneha e operacion di asistencia na barco manera servicio di tou, asistencia den caso di candela y derame di zeta, etc. Te awor aki e otro operadornan di e refineria no a haya necesario pa bin cu un compania separa pa esaki, pero constitucion di e compania separa ta indica cu Citgo, si yega na opera e refineria y e haf, lo ta desea di haci esaki.
Mientras tanto, por observa cu algun dia pasa Reuters a publica un articulo cortico tocante e deal cu Citgo unda a observa cu Valero no ta desea di bisa nada, pero segun Reuters nan lo a haya e siguransa di gobierno di Aruba cu nan lo por sali for di e asunto sin ningun responsabilidad pa cu medio ambiente y sin obligacion pa desmantela e facilidad. Esaki ta indicacion cu gobierno lo a yega caba na un acuerdo cu Valero.
