Cirugia di precision cu asistencia di robot a pasa prome test humano

Un test di un robot nobo pa cirugia di precision halto, usa pa opera un muhe cu cancer di pecho, a haya cu e sistema ta safe.

Esaki ta e prome test humano di un robot pa ‘supermicrocirugia’, un termino referiendo na cirugia riba ader cu ta midi entre 0.3 te cu 0.8mm. Ta un forma di cirugia cu unicamente un cantidad chikito di ciruhano mundialmente por ehecuta.

Investigadonan na Universidad di Maastricht a pone hunto un grupo di 20 muhe cu lymphedema, un condicion relaciona na cancer di pecho den cual exceso di likido ta colecta den tehido, causando cu esaki ta hincha. Tur tabata programa pa haya cirugia pa alivia nan sintoma door di conecta lymph vessels na adernan cercano, pues pasando banda di e area afecta. Nan a ser dividi den dos grupo: Uno lo ricibi unicamente cirugia manual, otro opera pa ciruhano usando un sistema robotico yama MUSA, fabrica pa un compania Hulandes yama Microsure.

E sistema ta activa pa pedal di pia, y un ciruhano ta controla e instrumentonan di precision halto usando joystick, monta riba mesa di operacion. E setup aki basicamente ta cancela cualkier temblor den man di e ciruhano y ta baha escala di movemento di su mannan na version mas sutil y refina. Por ehempel, si e ciruhano move e joystick un centimeter, e brasa di robot ta move 1/10 di milimeter.

E resultado: E grupo bou cirugia robotico a cura un tiki mas rapido ora investigadonan a check bek cu nan, pero mas aleu tabatin tiki diferencia entre nan dos. Sinembargo, e motibo di e test tabata pa demostra cu e sistema robotico ta safe y factibel, na luga di demostra superioridad.

Cirugia robotico no ta nada nobo. E sistema Da Vinci, e robot di cirugia miho bendi na mundo, a ser aproba pa FDA dos decada atras. E por opera cu un grado di precision di 1mm, pero no a haya cu e ta miho cu cirugia tradicional, y cu su prijs di $2 miyon – plus mantencion – ta mas caro.

Cirugia di precision halto ta un niche unda aparatonan robotico por potencialmente proba nan balor, esencialmente convertiendo ciruhanonan decente den clase mundial.  Sinembargo, lo mester mas test di mas ciruhano riba hopi mas pashent pa ta sigur.