Manera tabata di spera, e pelea den parlamento entre presidente y su vice presidente a capta tur atencion den e siman cu a pasa. Habriendo un siman nobo sin embargo no tin ningun señal cu tin algun accion na caminda pa sanciona e responsabel nan pa e accion bochornoso aki. Unicamente ta tende di cierto ‘damage control’ interno den partido. Por lo menos, esaki ta e impresion cu ta duna na prensa y publico den e dianan despues di e suceso. E diferencia ta naturalmente cu no ta den cas di partido e pelea a tuma luga, of riba caya, sino den sala di parlamento. E suceso a hiba naturalmente na algun fenomeno straño. Por arte de magia, of por ta cu ta lamper a dal den e luga, diferente persona a sufri un recaida completo di bista y memoria. Esun cu mas a haci su mes ridiculo ta e parlamentario cu a separa e bringadonan pero a haya un perdida inmediato di memoria, cu e no ta corda ta ken tabata bringando cu ken. En bes di gana respet eterno di henter comunidad papiando e berdad sunu ‘de una vez por todas’ ta parce cu el a consulta prome cu e ‘top dog’nan den partido pa despues bin afo declarando cu tur dos tin culpa. Esey nos tur sa caba, ta p’esey nos tin un dicho cu ta bisa “unda tin dos ta pleita, dos tin culpa”. Pero no ta esey ta e pregunta, e pregunta ta si e por duna claridad den e caso, unda dos parlamentario cu responsabilidad extra grandi, ta contradeci otro y ta haci denuncia cerca autoridad hudicial contradictorio. Tur dos a bay asina leu di haci denuncia oficial y ta mas cu claro cu un di nan a haci un declaracion cu no ta cuadra cu berdad. Esaki naturalmente ta algo hopi grave, pasobra automaticamente un di nan dos, pa corona obra, ta dunando otro mal ehemplo di falso testimonio.
Ta di spera cu ainda e parlamentario cu a haci un bon trabao di separa e bringadonan, en todo caso dilanti di autoridadnan hudicial por declara sin cu su memoria faya atrobe. Pero e probabilidad pa esey ta hopi chikito, ya cu ta mas probabel cu autoridadnan policial, cu of sin instruccion ‘di ariba’, no ta bay actua den e caso aki. Por ta cu nan ta bay sinta warda te cu un di nan of tur dos bin revoca nan denuncia, y cu esey e ora tur cos a caba. En todo caso por destila di loke a ser haci te awor na declaracion, cu ta busca un forma di haci ‘damage control’ y purba bin afo despues cu un declaracion cu tur cos ta oke atrobe, cu partidonan a sunchi, brasa otro, un lagrima cay aya, y tur cos ta paz y felicidad atrobe. Y como cu atake ta e miho defensa, ta critica y calumnia tur otro persona o instancia cu por tin un opinion den e asunto aki. Pasobra al fin y al cabo, nan por a bringa den publico, pero awor ta purba haci manera cu ta un asunto interno di partido y tur otro hende hala leu. Ademas, no ta solamente e dos parlamentario a haci nan mes eternamente ridiculo, sino tambe e esposo cu mester a corda riba e posicion di prestigio cu e mes tin como profesional. Pero, mester bisa si cu esey ta su responsabilidad personal ya cu e no tin un cargo publico y no debe nos un contesta.
Ta berdad cu e reglamento interno di parlamento no ta provee regla pa maneha e tipo di situacion aki y realmente no mester ta necesario tampoco. Den un pais normal, y den esaki sigur nos no ta un pais normal, e personanan envolvi mes ta entrega nan retiro, disculpando nan mes na comunidad y nan partido pa e daño haci. Y ta opinion publico mes, nos tur hunto, tin un cierto responsabilidad cu esaki no ta tuma luga y cu ta trata mas lihe posibel lubida kico a pasa. Pakico nos ta tanto enfoca riba ken a dal ken y con duro, etc. Nos gusta mas e parti di sensacion cu ta haci bo corda pelea na scol. Pakico nos no ta enfoca riba prestigio di nos institucionnan y exigi cu e personanan aki mester bandona e puesto pasobra nan ta un berguensa pa nos tur y cu nan no ta digno mas pa representa nos? Imagina por ehemplo awor cu e encuentro interparlamentario ta tumando luga unda nan mester representa nos; cu ki cara nan ta bay haci esaki? Loke nos ta mira ta bay sucede ta un intento pa tapa tur cos den seno di partido, lagando e pueblo atrobe cu e duda fuerte, si algun dia nos por mira un mehoracion den conducta di e ‘representantenan di pueblo’. E pregunta grandi cu ta keda ta: si nan no tin respet pa nos, pakico nos mester tin respet pa nan? En bes di ta e organo ‘mas halto’, e ta parce mas e organo mas desprestigia di Aruba.
