Bon Dia Aruba a entrevista Rebecca Roos, kende a yega di produci y dirigi varios shortfilms y documental na Aruba. Recientemente el a duna un tayer na Escuela Internacional de Cine y Television na Cuba. Un scol conoci cu nomber grandi, unda persona famoso den industria di cine a yega di duna lectura. Rebecca Roos ta splica cu el a haya e honor di por duna e tayer di con pa traha un documental.

Na januari, el a topa cu un productor di documental di Suisa na un festival. E scol a puntr’e pa e duna les den zomer, pa motibo cu e persona mes cu ta duna les no por atende. E cinematrografo tampoco tabata por, anto el a pensa pa bisa Rebecca Roos, ‘un super honor den mi mente’. “Si e ta kere mi por duna les, dicon no? Anto mi a bay.”

E scol na Cuba ta regular 3 aña, pero banda di esey tin e departamento di tayer ‘internacional y altos estudios’ cu ta wordo separa di e programa regular. El a bay duna un tayer di documental, cu tabatin tres siman di duracion intenso. Un grupo di henter mundo, di paisnan manera Australia, China, Inglatera a bin Cuba pa atende.

Sinembargo, Roos ta bisa cu no tur tabata persona den industria di cine, pero tambe periodista, antropologo y hende cu kier sa mas di con pa traha un documental. E producto final, a sali tres documental di 12 minuut. Un di nan a logra bay na un festival di cine.

“Di nunca traha un documental, anto logra haci investigacion y pitch e proyecto. Nan a forma dos grupo y filma. E scol a keda contento di estilo y resultado cu nan a pidi mi pa mi bolbe duna otro tayer.”

No ta solamente documental Roos ta traha, ‘mi ta mas conoci den documental cu ficcion’, pero e ta traha den ambos. Su interes pa traha un tayer aki na Aruba, e tin pa varios aña. E tabata duna les na academia di arte, un modulo di ‘moving image’ cu no tabata bay di documental, pero imagen cu ta haci movecion, manera den media y arte.

Awendia tin arte den video, instalacion cu ta move, movecion como fondo di arte. Pero pasobra el a haci e tayer dos biaha na Cuba, e lo kier purba set un tayer intenso na Aruba, tempo completo pa motibo cu ‘filma ta un trabou duro’. E plan di Rebecca Roos ta pa por financia e tayer, pasobra normalmente un tayer di area di film ta costoso. “Aki na Aruba tin otro tipo di comunidad, no tur por paga un cantidad halto.”

Ora e logra haya e financiamento pa cubri e gasto, e ta bay duna oportunidad na 20 studiante, pero cada un mester skirbi un carta di motivacion di con e ‘sponsor lo carga bo fee’, agregando cu e persona mester ta serio, pasobra cinematografia no ta facil.

E idea di a tayer aki lo ta pa haci 5 documental den e grupo di studiante cu lo atende. “E ta posibel cu lo haci e na San Nicolas pa documenta mas habri den e area. Esey ta intencion”, el a expresa.

Sinembargo a puntra Roos si e persona mester tin conocemento caba den area di traha pelicula. E ta contesta cu no, pero si un interes real, pasobra hende ta kere e trabou ta facil, pero un produccion ta duro, ‘no kere ta bay fancy of glamour’.

Su experiencia den area di trabou, ora cu hende cuminsa nan ta contento, pero ora nan ripara cu nan mester para den solo pa ora largo, no mag wak celular continuamente, e momento ey nan ta cuminsa ripara cu nan no kier mas, of esey no ta pa nan. ‘Eyes on the set’ mester keda pendiente.

E ta splica cu for di 2014 e ta purbando, pero un di dificultad cu ta enfrenta cune ta cu no tin un ekipo profesional, of no tin camara decente pa tur hende. “Awendia hende por graba cu nan celular, por ta no e miho calidad, aunke hopi celular ta filma bon. Anto por graba audio separa, cu esey por siña filma e basico.”

 

Roos su ultimo shortfilm ‘Paradiso’ a participa na Belize su festival di cine y na Amsterdam. E peticion ta aden pa asina mas oportunidad pa otro festival. Mas di esey e ta sigui traha su produccion y tambe cu otro produccion den exterior.