Manera nos a publica den nos edicion di ayera, Fundacion CineAruba ta sperando pa nan aplicacion pa subsidio di gobierno wordo trata. E fundacion ta traha riba proyectonan cu ta uni solucionnan pa problemanan social y personal den un contexto educativo cu ta desaroya e talentonan di e hobennan den traha filmnan.
Juan Francisco Pardo, coordinado di proyecto na CineAruba den su experiencia trahando cu hobennan ta conta Bon Dia Aruba cu ta haci falta di programanan educacional cu ta uni creatividad cu aspectonan social. CineAruba ta traha specialmente cu hobennan adolescente cu tin interes pa cualkier ramo di filmmaking, esta audio, video, actuacion, entre otro.
Un punto en particular cu hobennan ta desaroya durante e proyectonan di CineAruba ta e aspecto di team building, segun sr. Pardo. Durante e tayernan hobennan ta haya chens pa desaroya nan comunicacion, cual ta un di e rasonnan cu hobennan na Aruba tin dificultad pa enfrenta problemanan cu ta presenta den nan bida.
E aspecto di por trata problema social pa medio di desaroya hobennan su talentonan manera sr. Pardo a menciona ta un manera con por evita cu hobennan ta bay caminda robes. Manera Stichting Reclassering a menciona anteriormente den un entrevista cu Bon Dia Aruba, e situacion cu hobennan ta enfrenta ora ta bin den problema cu husticia ta hopi biaha pa via di problema social y e manera con hobennan no tin actividadnan pa haci pafo di scol.
Proyecto Ciudad Oraño enfoca riba conecta cu hobennan
Un ehempel di e proyectonan aki tabata Into Acting Youth Club, cual a cuminsa den 2015. Esaki e fundacion a traha riba dje durante un trayectorio di 1 aña y mey. E proyecto aki a wordo filma den 2016 y esaki a bira e miniserie cu CineAruba ta finalisando actualmente: Ciudad Oraño. Un grupo di hobennan a traha riba e proyecto aki por medio di traha tras di camara, actua of yuda elabora e storia.
Apart di e trabou cu e fundacion ta boga pe, cual ta purba trece solucionnan na problemanan cu hobennan ta enfrenta na cas of na scol di manera multidisciplinario, e temanan social ta wordo refleha bek den e filnan cu e fundacion ta produci. “Ciudad Oraño por ehempel ta un teen drama series pero ta trata temanan cu ta toca bida di hobennan manera bullying.”
Pa bin na e storia cu a wordo crea pa Ciudad Oraño, sr. Pardo ta splica cu nan a consulta telefon pa hubentud pa asina wak kico ta e problemanan cu hobennan mas hopi ta enfrenta den nos comunidad. Tur esaki pa asina por crea un serie cu hobennan por sinti nan mes identifica cu ne.
Festival di pelicula riba derecho di mucha
Sr. Pardo a conta nos cu el a haya chens pa por prepara pa participa cu e proyecto di Unicef su Children’s Rights Film Festival. Esaki ta un proyecto cu anteriormente a wordo hacie na Hulanda. Pero awo a dicidi di tambe envolvi e islanan den Reino pa participa cu e proyecto. Sr. Pardo hunto cu personanan representando Sint Maarten, Corsou, Boneiro y Sint Eustatius a haya un guia na Sint Eustacius riba con pa ehecuta e proyecto.
Esaki ta encera cu tur e islanan lo bay participa cu 4 scol cu lo pinta cada un di e derechonan di mucha. Di e 4 scolnan lo participa muchanan di 4de klas basis te cu 6de klas. Nan lo haya tambe splica kico tur e derechonan di mucha ta encera y dicon nan ta importante. Despues di esaki lo scoge un derecho cu tur mucha di e klas lo pinta. Esun cu wordo scogi pa representa e derecho particular miho lo wordo uza como base di inspiracion pa crea un film cu lo competi den e festival di pelicula pa e scol. Esaki lo tuma luga pa 4 scol, di cual lo scoge esun miho pa competi cu Corsou y Sint Maarten na Corsou cu e Curaçao-Rotterdam International Film Festival. Lo cuminsa cu e proyecto aki den januari.
“Esaki mi ta haya importante pasobra specialmente awo cu nos ta tratando hopi cu tema di derechonan di mucha. Un di e temanan cu lo conscientisa muchanan riba dje durante e proyecto por medio di un buki ta abuso sexual. Pues esaki lo sirbi pa laga e muchanan mes tambe papia riba e tema y informa nan mes.”
