Ayera DVG a ofrece un actualisacion riba e casonan positivo di COVID-19 na Aruba, como tambe a duna un relato di uso di mondmask y cua ta esun mas confiabel pa usa na e periodo aki.
Jurette Croes di DVG a informa cu ayera dia 2 di april a constata cinco caso mas positivo pa COVID-19, cu un total di 60 persona infecta.
Di loke ta trata pashentnan negativo nan tin 744, un caso pendiente, un caso inconcluso cu den oranan di atardi di ayera nan lo a mester ripiti e test, 806 persona cu a wordo getest y 1.235 persona den cuarentena.
Ademas, di e 60 persona cu ta pashent positivo, 31 di nan ta hende homber y 29 di nan ta hende muhe.
Di otro banda, Croes a splica cu di loke ta trata e mondmask, DVG ta sigui e consehonan y protocol di instancianan di salud internacional reconoci manera WHO, CDC, entre otro.
Di esaki, e instancianan ta conseha pa no usa e mondmask pa motibo cu e proteccion cu esaki ta duna ta minimo. “E ta mas un sentido di proteccion cu bo tin”, Croes a sigura.
Asina mes, el a señala cu ta hopi mas efectivo e labamento di man frecuentemente, uso di alcohol, gel sanitizer, e metodo di keda na cas lo mas posibel, asina como aplica distancia social. “Esaki ta mas efectivo cu e uso di un mondmask”, el a bisa.
Tambe tin otro factornan cu nan ta bisa pakico su uso no ta consehabel. E personanan cu tin mester di esaki urgentemente, cu realmente ta malo cu COVID-19, e persona aki si mester di dje y tambe e personanan cu ta traha den hospital, esunnan cu ta traha directamente tur dia cu e pashentnan positivo.
