Cinco persona a fayece y un a resulta herida, pa motibo di un accidente aereo cu a sucede ayera den llano di Colombia, medionan local a informa.
E avion ta pertenece na e empresa Aerosucre y tabata usa esaki pa transporta carga. El a accidenta na 10 miya di Puerto Carreño, Departamento di Vichada. E avion a lanta cu 6 hende a bordo, portal digital El Espectador a bisa.
E website a bisa cu e tecnico di vuelo Diego Armando Vargas, tabata e unico sobreviviente. Awor e ta den hospital cerca di e sitio di tragedia, unda e ta ricibi asistencia medico. E destino di e nave accidenta cu matricula HK4544 tabata Bogota.
Colombia ta e di cuatro pais na mundo cu mas accidente aereo, segun estadistica di Aviation Safety Network. E accidente di LaMia, cu a pasa na november ultimo, ta e accidente number 14 di aña 2016. Mayoria di accidente aereo ta involucra avion chikito.
