Ministro Otmar Oduber (POR) a haci entrega di ley pa cuater funcionario publico di Departamento di Naturalesa y Medio Ambiente, cu a wordo nombra como toezichthouders (supervisor), pa asina nan por vigila y maneha ora tin algo no adecua cu naturalesa of medio ambiente.
E supervision ta diferente ley cu ta cay bou di e Departamento di Naturalesa y Medio Ambiente. “A base di maneho y implementacion, nos ta mira cu no ta eherce control riba maneho cu ta existi. E inspeccion mester tuma luga pa ta sigur cu ta cumpli cu ley.”
Pa preservacion di naturalesa y medio ambiente, Oduber a bisa cu e comision di 5 experto ta cay bou di DNM. A pidi conseho di e comision pa e buraco cu a keda rond di e isla pa atende y otro problema cu ta causa daño na medio ambiente. Pa por supervisa locual ta trata henter e maneho di sushi y desperdicio.
“Nos tin ley y maneho na cantidad, pero ta keda un problema pa tin hende cu e autoridad di actua conforme e ley. Pa e motibo aki, 5 funcionario lo tin e poder di supervision, antes tabata tin un so pa haci e tarea”, e mandatario a bisa.
Pa e aspecto aki, e mandatario ta splica cu tabata dificil pa un persona haci e trabou di vigila e permiso di construccion. Tambe e mandatario a bisa cu e proceso di permiso di construccion no ta pa prohibi, sino pa yuda conserva, y cu pa ley e ta wordo protegi.
Agregando cu e control ta bay tuma luga cu e obligacion di loke ta trata e cuido di naturalesa y medio ambiente. E mandatario a expresa cu a duna poco atencion a base di e cuido di flora y fauna pa enfoca riba e desaroyo economico y di infrastructura.
El a remarca cu DIP, DOW y City inspector tambe por tin funcionario pa haci e estudio di supervision, pa asina duna forsa na e ley, y pa actua dunando e boet/ sancion pa percura cu tur cos wordo cumpli manera debe ser, y hende ta consciente cu tin ley.
