Despues di mas di un aña di reapertura di frontera, exportacionnan for di Venezuela pa Aruba ta di 245 ton loke ta representa un 6.86% segun cifranan publica recientemente pa Camara di Comercio di La Vela di Coro.

E organisacion a señala na e medio Cronicas del Caribe cu den ultimo 12 luna a manda 3.575 ton di productonan Venezolano pa islanan ABC, na unda e destino principal ta Corsou.

Den un aña exportacionnan for di e waf di La Vela di Coro, estado Falcon pa Aruba, Boneiro y Corsou a crece den un 273,91%, segun Camara di Comercio y Turismo di La Vela di Coro.

Nan ta sigura cu na mei 2023 a sali 115 ton di productonan Venezolano, mientras cu na mei di 2024 e cifra a subi te 315 ton.

E total di exportacion registra den ultimo 12 luna ta di 3.575 ton, e destino principal ta Corsou cu 3.330 ton (93.14%), despues Aruba cu 245 ton (6.86) unda e mercancia ta inclui frutanan, berdura, mata, carbon vegetal, pisca, materialnan di construccion, entre otro.

Aunke nan ta celebra e reactivacion di operacionnan comercial cu e islanan, e presidente di Camara di Comercio di La Vela di Coro, Juan Gotopo a bisa cu ta lamentabel cu e crecemento di e intercambio “no a haci un impacto economico na municipio Colina, pasobra e aumento di consumo di bienes y servicio na nivel local no ta wordo refleha.”

“Mayoria di productonan cu ta exporta no ta produci akinan, ta bin for di otro estadonan manera Carabobo, Yacacuy, Aragua, Lara y Los Andes Venezolano. E yamada ta pa uni esfuersonan entre sector publico y priva di e region pa crea programanan di incentivo y asina motiva e productor local di Falcon pa probecha e oportunidad aki,” Gotopo a bisa.

Bon Dia Aruba a puntra Gotopo riba e diferencia entre envio di productonan di Corsou pa Aruba e cual ta hopi mas, el a contesta cu “E barconan pa Corsou y Aruba ta sali for di La Vela di Coro, historicamente e comercio di La Vela di Coro semper tabata cu Corsou, esun di Aruba ta sali for di e waf di Guaranao, Las Piedras, debi na e cercania. Pero exportadonan ta preferi di haci envio for di La Vela pa Aruba pero no ta hopi, sinembargo, ta bin aumentando poco a poco. E comercio cu Bonaire ta sali for di Tucacas y Corsou, pero esaki ta nos cifranan como Camara di Comercio di La Vela di Coro cu no ta inclui Guaranao ni Tucacas.”

Dia 6 di juni 2023, un cargamento di aproximadamente 85 ton di frutanan, berduranan y otro productonan a yega na waf di Barcadera for di Venezuela den e barconan El Maracucho y La Gaviota na unda e capitannan y su tripulantenan a bay bin Aruba un biaha pa siman, manera nan a informa.

Entre e productonan cu nan a cuminsa trece tabatin tomati, awacati, promenton, keshi blanco, maizena, chuculati, banana, entre otro.

E tempo ey un di capitannan di e barco a solicita na Gobierno di Aruba pa considera e opcion pa nan mes lo por a bende nan mesun productonan directamente na consumidor, algo cu te ainda no a tuma luga.

Pa esaki, Prome minister Evelyn Wever-Croes den un conferencia e tempo ey a señala cu Aruba ta depende hopi di e comerciantenan, nan a tuma e decision di importado cumpra e mercancia na e barconan pa motibo cu ta existi e rekisito di visa y pa personanan di e barconan aki bin y drenta na e waf di Playa nan tur mester di visa y esey na Venezuela no tabata considera como algo factibel na e momentonan ey.

“Nos mester yega na un areglo cu nan no tin mester di visa y esaki ta e unico areglo, bo ta yega na waf, bo ta keda na e parti sigura di e waf y e agencia ta esun cu ta cumpr’e,” prome minister a sigura na juni 2023.

E acuerdonan aki pa barconan por cuminsa bin na Aruba aña pasa no tabata algo nobo manera prome minister a sigura, tabata acuerdonan cu a aplica caba na 2018 ora presidente di Venezuela Nicolas Maduro a dicidi di cera e fronteranan unilateralmente y na mei di e mesun aña ey, ambos pais a yega na e convenio aki cu e personanan envolvi di estado Falcon ken a bin Aruba y a sinta cu gobierno pa tene un reunion y cuminsa aplica e acuerdonan aki.

Camara di Comercio di Aruba a solicita apertura di frontera cu Venezuela

Igualmente e medio Cronicas del Caribe na juni ultimo a publica un entrevista cu e presidente di e institucion aki Diederik Kemmerling, ken a menciona cu e medida di reapertura total di frontera cu Venezuela ta busca un ampliacion di intercambio comercial entre ambos pais, “Na Aruba nos ta importa hopi producto for di Merca y Hulanda cu prijsnan halto, ta importante tin conexion cu Venezuela pa importa berduranan y frutanan cu prijsnan mas economico. Na e momentonan aki a nos no ta importa ni exporta hopi for y pa Venezuela,” el a sigura.

Ademas, el a sigura cu nan a realisa misionnan comercial y a mantene reunionnan cu Gobierno di Venezuela pa busca e apertura di frontera, aunke te ainda no ta posibel debi na limitacionnan logistico na aeropuerto.

Tambe Kemmerling a afirma cu economia Venezolano a mustra señalnan di mehoracion, loke ta reforsa e posicion di Camara di Comercio pa duna importancia di mantene un relacion cercano cu e pais bisiña.