Minister di Turismo, Dangui Oduber, a informa den un video publica riba Facebook cu resultado di recuperacion di turismo durante e prome trimester di aña 2023, tabata impresionante y a surpasa cifranan di aña 2019.
“Resultado di luna di maart ta impresionante, nos ta hopi contento cu e resultado di turismo pa luna di maart, pero tambe pa e prome tres luna di aña 2023,” Minister Oduber a expresa.
El a informa cu den luna di maart ultimo Aruba a ricibi 109.295 turista stayover. Esaki ta un recuperacion di 102% den comparacion cu luna di maart di aña 2019.
El a sigui splica cu nan ta usa aña 2019 como e liña di base teniendo cuenta cu aña 2019 tabata e miho aña den historia di turismo pa pais Aruba y p’esey ora nan a fiha e strategia di recuperacion di turismo nan a usa aña 2019 como e aña di referencia y pa yega back na e nivelnan aki, te hasta surpasa e nivelnan di aña 2019.
Pa loke ta e prome tres lunanan di aña 2023, Minister Oduber a indica cu den luna di januari tabatin un recuperacion di 105%, cu ta riba e cifra di aña 2019, den feburari tabatin un recuperacion di 105% tambe y pa luna di maart tabatin un recuperacion di 102%.
“E resultadonan aki ta sumamente impresionante pa habri aña 2023 di e forma aki, conforme e strategia, conforme e vision y e maneho cu nos ta hibando no solamente pa recupera nos turismo back, pero percura pa trece e turistanan afluente y tambe percura pa surpasa nivelnan di aña 2019,” el a remarca.
Pa loke ta e reslutadonan di turismo crucero, Minister di Turismo a menciona cu pa luna di maart di e aña aki, Aruba a ricibi 114.504 turista crucero, cifra cu tambe ta sirpasa e nivel di luna di maart di aña 2019.
El a enfatisa c e resultadonan aki ta un indicacion cu aña 2023, ta mustra di ta bay ta uno positivo pa loke ta trata industria di turismo den cuadro cu e recuperacion y entrada cu turistanan ta laga atras pa economia di Aruba
“Nos kier a gradici tur nos partnernan den turismo, tur e departamentonan cu ta atende cu turista, tur e empleadonan cu ta traha diariamente cu e huespednan y cu ta brinda un excelente grado di servicio, y danki na tur cu ta contribuyendo na un excelente resultado di nos turismo,” el a finalisa.
