Cifranan di violencia den relacion a aumenta na 300%; Fundacion Contra Violencia Relacional ta recauda fondon pa aumenta nan espacio pa refugio

16 dia di Activismo Contra Violencia di Genero. Un pais civilisa ta lucha pa igualdad den tur forma, como tal no por permiti cu pa e simpel hecho di ta muhe un hende ta wordo intimida, humilia, abusa of viola.

Fundacion Contra Violencia Relacional (FCVR) a tene un entrevista cu Bon Dia Aruba den cual a splica tocante nan campaña di 16 dia di activismo pa conscientisa pueblo contra violencia di genero, ‘Orange the World’, cu a cuminsa dia 25 di november ultimo, cu ta e Dia Internacional pa Eliminacion di Violencia contra Hende Muhe y Mucha Muhe. Esaki ta caba dia 10 di december, Dia Internacional di Derechonan Humano. Durante e dianan aki nan tambe ta bin colectando fondonan pa asina nan por sigui brinda ayudo na esunnan cu ta pasa den e dificil situacion di violencia relacional.

Magaly Maduro, coordinador di e fundacion, a comenta cu for di diasabra 27 di november, 4 di december ultimo y 11 di december awor nan ta bin colecta fondonan pa motibo cu na comienso di e aña aki nan a aumenta nan espacio pa hende muhe y nan yiunan pa refugio, nan a bay di 4 espacio pa 20 pa asina yuda hende muhenan na momento di dificultad den nan relacion.

Pa nan por opera un instancia di e tamaño ey nan mester di mas fondo di loke nan ta dispone actualmente na unda cu e presidente a bin cu e idea di haci colecta den periodo aki, ‘Orange the World’ y conscientisa comunidad riba e problematica di violencia den relacion.

Pa nan por alcansa e obhetivo nan a pone como meta 20.000 florin. Pero diasabra 27 di november so nan a logra recauda 7.000 florin sin conta diasabra ultimo 4 di december y 11 di december awor. “Pero esaki ta e cifra minimo, cada florin cu nos ta recauda ta pa e bienestar di hendenan cu ta keda cerca nos pasobra te ainda nos shelter, e parti residencial ta wordo cubri door di e fundacion y su fondonan, nos no ta cobra ni un florin pa nan keda cerca nos y tur cos ta birando caro, p’esey nos ta haya cu nos mester haci e accion aki pa nos por recauda fondo”, Maduro a menciona.

Maduro a informa cu violencia den relacion a aumenta un 300% y loke nan ta compronde for di nan analisis ta cu e cifranan aki no ta keda keto, pero e parti mas importante ta cu nan logrando kibra e silencio, kibra e taboo cu tin riba e topico aki.

“Pa hopi aña, pa decadanan, hende muhe a wordo maltrata y hopi di e muchanan tabata e victimanan di e violencia den cas of violencia den relacion y aworaki nos ta mira cu mas y mas hende ta papia riba e problematica y ta busca un solucion, pasobra na final di dia tur hende kier un solucion pa e problema aki”, Maduro a enfatisa.

Pa loke ta trata e cifranan, Maduro a expresa cu na aña 2020 nan a provee na 357 persona ayudo riba e base ambulatorio, segun estadisticonan di e aña aki tambe a bin dilanti cu 51% di e personanan cu a acudi na FCVR ta pa servicio ambulante, ta personanan cu a acerca fundacion pa prome biaha.

E mayoria di nan clientenan ta den un matrimonio of relacion serio cu un pareha y tambe 74.6% ta un mayor na unda nan ta ofrece guia y intermediacion na mayornan pa mehora comunicacion den caso di separacion of divorcio pa bienestar di e menornan.

Igualmente a bin dilanti cu 93% di nan clientenan ta hende muhe cu a acudi na nan pa violencia relacional, sinembargo, 7% ta hende homber cu a pidi ayudo ambulatorio.

Aña 2020 tabata aña di pandemia di Covid-19 y pa e motibo ey Maduro a señala cu esey tabata e origen di hopi mas problema, te luna di october di e aña aki, nan tabatin registra 157 persona cu ayudo ambulatorio, tambe nan a yuda riba 30 hende muhe hunto cu mas di 60 mucha caminda el a bisa cu e problema ta keda grandi pero nan ta sigui haci nan trabou tambe.

Di mesun manera, el a conta cu e fundacion tin cinco pilar: esun ambulante cu ta pa hendenan cu mester di informacion, cu ta yega na e fundacion pa busca guia, banda di esey nan tin e parti residencial unda cu nan ta duna hende un espacio na unda nan por keda cerca e fundacion, di esaki manera el a menciona caba nan tabatin 4 espacio y awor a bira 20 espacio pa hende muhe y nan yiunan.

Banda di esey nan tin After Care na unda fundacion ta zorg pa señoranan cu a sali for di nan situacion ta haya guia despues cu nan tabata cerca e fundacion, tambe nan tin charlanan y programanan na scol y hotelnan hunto cu otro instancianan cu nan ta ofrece ayudo den e parti hudicial pa asina por educa comunidad pa cu e topico.

Maduro a expresa cu nan ta acerca parlamentarionan y personanan den gobernacion pa nan por cambia e leynan pa motibo cu cambio di ley ta algo cu nan ta bin solicitando for di basta aña pasa, pa cu esaki el a bisa cu den region y Caribe tin paisnan cu ley di proteccion pa hende muhe y Aruba no ta conta cu esey.

“Pa nos yega asina leu nos mester educa nos gobernantenan, nos tin cu papia riba e topico aki pa mira e necesidad cu nos mester di un ley pa hende muhe, tambe a wordo papia riba e castigo y cu nan ta mira e genero, actualmente e ta wordo mira solamente como un agresion, siendo cu nos tin cu pon’e mas den un luz, cu esaki ta un acto criminal cu bo ta haci pero te ainda e no ta wordo mira como tal, y pa e motibo ey nos castigonan ta abou”, el a sigura.

Pa finalisa, el a splica cu esaki ta algo cu ta tuma basta tempo cu ta parti for di e legislacion y pa nan por yega asina leu nan tur hende tin cu compronde esaki, loke nan ta mira ta cu den proximo añanan nan lo por logr’e, nan tin contacto cu ministernan y parlamentarionan caba pa nan por haci e cambio den ley cu nan ta bin trahando par di aña den dje y nan ta sigui “pasobra tanten cu e no cambia, nos tin trabou”, Maduro a señala.