Minister Dangui Oduber orguyosamente ta anuncia e cifra nan di “Hotel Performance” pa e luna di augustus 2019. Cu hopi satisfaccion por mira e resultadonan cu a drenta y cu ta indica cu turista nan di calidad ta sigui bishita nos isla. Unabes mas ta keda confirma cu Aruba su turismo ta riba un nivel halto manera nunca bisto prome. 

Tur e indicadornan ricibi door di “AHATA” ta sumamente positivo y ta duna peso na e vision y maneho di Minister Dangui Oduber.

Segun e comunicado cu Bon Dia Aruba a ricibi ta indica cu Minister Oduber na tur ocasion ta conta e importancia cu pa Aruba su turismo sigui desaroya den un manera sostenibel mester adapta e modelo “Calidad riba Cantidad”. P’esey e maneho di Ministerio di Turismo ta sigui pone enfasis pa target turistanan di calidad y turistanan cu tin un capacidad di gasta placa hopi halto.

Resultado di Hotel pa luna di augustus 2019.
Den luna di augustus e grado di ocupacion a subi cu 5.2 porciento compara cu augustus 2018 y asina aki Aruba ta keda posiciona su mes como un competido fuerte den e area di Caribe. Aunke lunanan di zomer normal ta conoci pa ta “low season” por bisa cu e aña aki casi esaki no ta e caso mes.

Si nos tira un bista riba e indicador di RevPAR den luna di augustus a conoce un crecemento di 11.7% den comparacion cu luna di augustus 2018. E RevPAR den augustus 2019 tabata $207.18 y esun di e aña anterior tawata $185.45. E RevPAR ta keda un indicador sumamente importante pa midi e calidad di turistanan cu ta bin Aruba. Manera ta conoci e RevPAR ta e prijs cu un turista ta dispuesto pa paga pa un camber pa anochi.

RevPar ta e indicador principal cu ta indica cu turistanan cu un “capacidad halto di compra” ta biniendo nos isla. E mandatario a duna di conoce cu Ministerio di Turismo sin duda lo sigui enfoca pa adapta strategianan dirigi specificamente na e tipo di turistanan aki y pa asina sigui crece e RevPAR mas ainda. Cu un RevPAR halto lo no por tin duda cu e turistanan ta contribui enormemente den Aruba su economia.

Otro indicador hopi importante ta e ADR (tarifa promedio pa dia) cu tambe a conoce un aumento di 5%. E tarifa promedio pa dia den luna di augustus 2019 ta $238.05.

Maneho di minister Dangui Oduber ta sigui duna resultado conforme e vision di atrae turistanan di calidad. Resultadonan di luna di augustus ta positivo y ta mustra cu lo sigui ta pa resto di lunanan di aña 2019. Minister Dangui Oduber ta felicita tur esunnan cu ta lanta tur dia cu e determinacion pa traha y hiba nos isla su turismo padilanti.

Turismo ta keda e motor principal di nos economia