Cifranan di prome 6 luna di entrada di gobierno

Manera por construi for di cifranan di Banco Central di diferente Boletin Mensual, e cifranan di entrada cu ta duna un imagen, no perfecto, di con finanzas di gobierno ta moviendo, a bira disponibel desde ayera, cu e publicacion di e Boletin pa luna di juni. Un bista mas completo lo ta disponibel despues cu ministerio di Finanzas facilita su informe tocante e segundo trimester di 2019, y lo por tuma nota tambe di e opinion di CAft riba esaki. Pero en todo caso aki algun cifra preliminar.

Por deduci di e imagen aki cu entrada total, y entrada total di impuesto ta keda atras compara cu aña 2018. Esaki en todo caso pa un parti ta explicabel di cierto desaroyo anticipa, manera entrada di winstbelasting cu lo a mengua, a base di e cambio den manera di cobra di algun aña pasa, cu a causa un acumulacion di diferente aña di cobransa. Tambe ta conoci cu cierto impuesto manera Grondbelasting a sali relativamente laat, loke ta haci cu e entrada ey ta cay mas laat den aña tambe. Loonbelasting ta mustra bastante menos cu 2018, pa cual na e momento aki nos no ta dispone di un splicacion. BBO ta mustra na mas o menos e mesun nivel cu 2018, tumando na cuenta cu e porcentahe a bay di 1,5% pa 3% desde juli 2018. Impuesto relaciona cu importacion ta mustra riba un crecemento leve.