Recientemente, Oficina Central di Estadistica a publica su Statistical Overview of Aruba, cu ta duna datonan relevante tocante diferente sector di nos comunidad. Pa e sector di Negoshi, e datonan di CBS ta cubri e periodo di 2015 pa 2021.

Den e sector di Negoshi, CBS a nota cu e cantidad di compania registra cerca Banco di Seguro Social (Svb), es decir, cu tin un of mas empleado te cu fin di aña a baha di 3.782 na 2020, pa 3.743 na 2021.

Ademas, e cantidad di empleado registra tabata 46.362 te cu fin di 2021, di cual 41 porciento tabata emplea den industria di “Actividad di Acomodacion y i Servicio di Cuminda,” y “Wholesale & Retail.”

Industrianan di “Real Estate,” “Actividad profesional, cientifico y tecnico,” y e “Actividad administrativo y servicio di sosten” a duna trabao na 15 porciento di e cantidad total di empleado registra. E ultimo industria aki ta inclui companianan di manpower temporal, di cual e empleadonan ta activo den varios otro industria.

Tendencia di salario mensual averahe na Aruba
 Entre 2015 y 2021, e salario mensual averahe den tur actividad economico na Aruba a mustra fluctuacionnan modesto, cu un tendencia general di aumento pa fin di e periodo. Por ehemplo, na 2015 e salario mensual averahe tabata Afl. 3.504. Esaki a aumenta levemente na 2016 na Afl. 3.511, prome cu baha na Afl. 3.451 na 2017 y Afl. 3441 na 2018.

 

Un recuperacion notable a sucede na 2019, cu e averahe aumentando na Afl. 3.641, e nivel mas halto observa den e periodo aki.

Sinembargo, na 2020 salario a baha na Afl. 3.497, probablemente reflehando e impacto economico di pandemia di Covid-19. Pa 2021, e salario averahe a recupera un tiki, na Afl. 3.586, marcando un aumento YOY di 2.5 porciento.

A pesar di e volatilidad, specialmente rond di 2020, e datonan ta mustra cu economia di Aruba a logra mantene nivelnan relativamente stabiel di salario durante añanan, cabando 2021 cu un salario averahe 2.3 porciento mas halto cu na 2015.

Desigualdad di salario y tendencia pa sector
 E salario mensual medio na Aruba den tur sector a registra un aumento modesto di Afl. 2.560 na 2015 pa Afl. 2.734 na 2021, reflehando un aumento di 3.2 porciento durante e periodo di siete aña. Sinembargo, datonan specifico pa cada sector ta revela desigualdad di salario y patronchinan cambiando durante añanan.

E sectornan miho paga ta electricidad, gas, vapor y suministro di airco, consistentemente registrando e salario medio mas halto, aumentando di Afl. 5.807 (2015) pa Afl. 6.331 (2021) – un aumento di 9 porciento. Esaki a registra un peak na 2020, di Afl. 6.366.

Suministro di awa, rioolering, y maneho di desperdicio a sigui di cerca, aumentando di Afl. 5.438 na 2015 pa Afl. 5.896 na 2021.

Educacion, antes e sector miho paga na 2015 (Afl. 5.218) a keda stanca te cu 2021 (Afl. 2992), indicando un reduccion relativo den competitividad.

Entre e sectornan cu pago mas abao, actividadnan administrativo y servicio di sosten a keda e sector pio paga durante e periodo, cu salario aumentando apenas un tiki, di Afl. 1.921 (2015) pa Afl. 1.950 (2021).

Otro actividadnan di servicio tambe a keda te abao, cu un aumento menor di Afl. 2.050 pa Afl. 1.993, sugeriendo stagnacion.

Entre e sectornan cu crecemento notable, transporte y almacenahe a mustra crecemento notable di salario, di Afl. 2.700 pa Afl. 3.000 na 2021 – un aumento di 11 porciento.
Actividadnan di acomodacion y servicio di cuminda, un industria clave na Aruba, a mehora di Afl. 2.434 pa Afl. 2.522, maske a keda bao di e medio nacional.

Actividadnan di salud y trabao social a aumenta di Afl. 4.125 (2015) pa Afl. 4.279 (2021).

Salario pa administracion publico y seguridad social a keda relativamente plat, subiendo y bahando di Afl. 4.200-4.300, clausurando na 2021 na Afl. 4.337.

Salario den arte, entretenimento y recreacion tabata volatil, pero a mehora di Afl. 2.803 na 2015 pa Afl. 2.787 na 2021, mustrando un recuperacion post-pandemia despues di un dip na 2020 (Afl. 2.102.)

Tendencia di empleo segun sector economico
 Durante e periodo di siete aña, mercado laboral di Aruba a experimenta cambionan significante, particularmente entre 2019 y 2021 – influencia pa pandemia di Covid. E datonan di Banco di Seguro Social (Svb) ta duna un bista riba cua sector a crece, contrae of mustra resiliencia.

En general, na 2015 tabatin 46.605 empleado registra cu Svb. Empleo a peak na 2018, cu 55.895, y despues a registra un caida skerpi na 45.978 na 2020 durante pandemia. Pa 2021, empleo a recupera un poco na 46.361, ainda 9.500 trabao menos cu e peak na 2018.

Sector di bienes a keda relativamente stabiel, variando di 4.597 (2015) pa 4.794 (2021).

Manufactura a keda stabiel, cu 1.151 empleado na 2021 – un reudccion leve for di 1.177 na 2015.

Construccion a recupera na 2021 pa 2.897, recuperando di un caida na 2020.

Sectornan di electricidad, gas y awa (utilities) a mantene tamaño chikito pero consistente di forsa laboral.

Un dato clave ta cu e industrianan di produccion di bienes tabata mas resiliente pa contraccionnan relaciona cu Covid-19.

Sector di servicio tabata duna trabao na e gran mayoria di forsa laboral di Aruba, cu 42.008 trahador na 2015, cu un peak di 50.047 na 2018 y bahando na 41.567 na 2021.

Actividadnan di acomodacion y servicio di cuminda tabata e dunado di trabao singular mas grandi, cu 11.577 empleado na 2021, a pesar di perde mas cu 1.400 trabao entre 2019 y 2021.

Industria di wholesale y retail tambe a mira un caida for di 8.398 na 2019 pa 7.230 na 2021.

Administracion publico y educacion a keda stabiel of a aumenta levemente, indicando stabilidad di trabao den sector publico.

E sectornan di hospitalidad y retail tabata esunnan mas afecta durante pandemia, alineando cu ciere di frontera y reduccion den turismo.

E perdidanan mas grandi (2019-2021) tabata:

Acomodacion y cuminda: di 13.060 pa 11.577 empleado.;
Retail: di 8.398 pa 7.230 empleado;

Administracion y sosten: di 5.832 pa 4.497 empleado;

Sectornan cu a keda stabiel of a aumenta tabata:

Educacion: a mantene mas cu 2.400 empleado;

Salud y trabao social: a aumenta di 2.378 (2015) pa 2.862 (2021).

Companianan registra pa cada sector
 E cantidad di compania registra na Aruba a aumenta di manera stabiel, di 3.130 na 2015 na un peak di 3.782 na 2020, prome cu un caida leve na 3.743 na 2021. E aumento aki ta indica un ambiente empresarial resiliente y den expansion, a pesar di impacto di pandemia den cierto sector.

E cantidad total di compania registra, na 2015 tabata 3.130. Pa 2020, tabatin 3.782 compania, un aumento di 21 porciento den 5 aña. Na 2021, a mira un caida leve na 3.743, mustrando contraccion minimo.

E sectornan cu a crece mas lihe tabata acomodacion y cuminda, di 823 (215) pa 890 (2019), despues kedando stabiel te 2021, reflehando actividad empresarial halto den hospitalidad.

Wholesale y retail a aumenta di 275 (2015) pa 430 (2020) – un crecemento di 56%, despues a baha na 378 na 2021.

Servicio profesional, cientifico y tecnico, a pasa di 256 na 2015 pa 264 na 2020, un crecemento modesto pero stabiel.

Servicio di informacion y comunicacion y financiero a mustra aumentonan chikito pero stabiel.

Pa loke ta sectornan cu a registra menos crecemento, electricidad, gas, airco y administracion publico a keda plat, cada un cu menos di 5 compania registra durante añanan.

Manufactura y construccion tabatin aumento leve pero a keda abao en general den termino di cantidad di compania.

Na 2021, di un total di 3.743 compania, mas cu 3.100 tabata den sector di servicio, confirmando e economia di Aruba fuertemente orienta riba servicio. Esaki ta inclui negoshi no solo relaciona cu turismo, sino tambe salud, educacion, arte y otro servicio di sosten.

A pesar di perdida di trabao mira den hospitalidad durante pandemia, e cantidad di compania a keda halto, implicando potencial pa recuperacion of un cambio pa operacionnan di menor escala (micro-empresa of eenmanszaak.)

Distribucion regional di negoshi
 Entre 2015 y 2021, e cantidad di compania registra a aumenta di manera stabiel den casi tur districto di Aruba, reflehando no solo expansion economico general, sino tambe un distribucion geografico mas amplio di actividad comercial.

E hubnan comercial principal tabata Noord/Tanki Leendert, cu consistentemente tabatin e mayor cantidad di compania, aumentando 23.3% di 789 na 2015 pa 973 na 2019.

Oranjestad Oost a sigui di cerca, cu 798 compania na 2015 aumentando na 881 pa 2019.
Oranjestad West tambe a mira aumento di 777 pa 901, reflehando e importancia duradero di e capital como centro comercial.

E tres region aki a conta pa 74% di tur compania na Aruba na 2018.

Entre e districtonan emergente, Paradera a aumenta di 199 na 235 compania, mustrando un aumento stabiel den presencia di negoshi chikito. Santa Cruz a crece di 242 pa 285. Savaneta y San Nicolas (Nort y Sur) tambe a mira crecemento modera, maske di un base mas chikito.
Notablemente, San Nicolas Sur a crece di 115 pa 132 compania, posiblemente vincula na esfuersonan di revitalisacion.

E datonan ta mustra cu comunidad comercial di Aruba ta concentra den Noord-Oranjestad, pero un descentralisacion modera ta na caminda. E distribucion regional ta alinea di cerca cu densidad di poblacion, infrastructura y proximidad cu zonanan turistico.