Situacion di Covid-19 na Aruba no a drecha den ultimo siman, al contrario. Loke por observa for di e resumen di caso nobo registra (acumula) y casonan activo den e periodo 07 pa 13 di september, ta cu e cantidad di caso activo a bay na un nivel mas halto, di 1223 dia 07 di september pa 1486 caso dia 13 di september, no menos cu 263 caso activo mas.
Den un resumen anterior nos por a constata cu e aumento di caso activo entre dia 1 y dia 8 di september tabata mustra mas modera cu den e simannan anterior di augustus. E tabata na un aumento di 44 caso activo den e siman entre dia 1 y 8 di september, loke tabata mustra positivo, aunke cu esaki ainda e curva no ta baha, e cantidad di caso activo a keda crece, y den ultimo siman mas rapido, manera por observa den e grafico di Worldometers, a base di e cifranan oficial di Aruba, manera duna pa nos autoridadnan na e instancianan internacional.
Pa loke ta e relacion entre caso activo y caso considera recupera, por bisa cu e division ta keda alrededor di 49% caso activo y 51% caso recupera.
E situacion na Hospital ta sigui sumamente grave, manera e carta di emergencia di asociacion di specialista di e fin di siman aki ta indica y cu a keda publica den nos edicion di diasabra ultimo. Compara cu un par di dia pasa e presion riba e sala a baha un poco ayera, yegando na 27 riba sala, cu tabata riba 30. Di otro banda, e ocupacion di ICU a subi na 12 persona indicando cu no tin un alivio den esaki, anto ademas combina cu e aumento fuerte di caso activo manera menciona, cu ta haci cu proximamente por anticipa cu di e grupo mas grandi aki potencialmente por haya mas pacient den condicion serio, cu mester cuido den hospital y/o di ICU.
