Parlamentario Chris Dammers a mustra cu a base di e prome kwartaal di Banco Central e proyeccion sigur pa loke ta economia di pais Aruba, por tuma nota cu esaki compara cu 2016, tin un entrada di 842.5 miyon florin mientras pa loke ta e aña aki, e ta para na 872.5 miyon.
“Sin duda ta un desaroyo cu nos ta sumamente satisfecho cune y cu ta confirma cu e vision di Gobierno di AVP den ehecucion di su programa di gobernacion, esaki ta sigui duna su resultadonan positivo pa nos pais.
Ya caba nos por mira un crecemento di 3.5% comparando cu esaki bek cu locual ATA a pronostica den pasado cu e crecemento nan lo ta calculando na 1%, nos por constata cu aki tambe nos ta riba e pronosticonan calcula.
Mirando sigur e industria di turismo, tur nos hendenan cu ta traha den e sector turistico, tur cu ta duna nos bishitantenan e miho servicio posibel, nos tin cu gradici nan tur, nos tin cu gradici y elogia e maneho tras di industria turistico aki, mirando e crecemento den e industria aki cu sigur ta e pilar cu ta carga nos economia di Aruba.
Pues tanto resultado di “Uitvoerings Rapportage” cu a bira conoci y tambe e resultado riba turismo acumula pa Banco Central, ta mustra cu Gabinete Mike Eman II ta sigui ehecuta su plan di maneho sigurando un desaroyo economico positivo cu perspectiva hopi bon pa resto di aña.
E cifranan aki cu tur miembro di Parlamento y fraccionnan a ricibi ta mustra completamente un otro panorama cu locual politiconan di oposicion ta hibando den campaña electoral, caminda e nan ta sigui plama negativismo cu informacionnan incorecto pero caminda e maneho efectivo di Gobierno di AVP, ta sigui mustra riba un maneho responsabel, un maneho di seriedad pa guia economia di nos pais den e bon caminda,” Parlamentario Chris Dammers ta mustra.
