Diamars pasa, AZV a celebra Dia Internacional di Hende Homber cu e charla informativo Macho Crioyo na instalacionnan di Do It Center na Shaba. Aki a duna di conoce cifra tocante diferencia entre homber y muhe riba tereno di cuido medico. Tambe tabata presente algun fundacion pa conscientisa poblacion di importancia di evita malesa y biba mas saludabel.

Solange Tchong, vocero di AZV, a duna di conoce cu dentro di e evento cu nan a tene algun luna pasa, cu tabata Aruba Health Fair, nan a ripara cu tabata falta e asistencia di hende homber y ta resalta di nan cifranan cu aparentemente hende muhe ta mas consciente di nan salud, compara cu hende homber.

Cu esey na bista, Tchong a splica cu nan a dicidi di analisa tur e cifranan y por ehemplo, el a bisa cu cifra di diabetico ta indica cu alrededor di 4.500 hende muhe ta sufri di e malesa aki, den comparacion cu 3.600 hende homber. Tocante esaki Tchong a comenta cu e ta duna un indicacion cu hende homber kisas ta menos consciente di nan salud of no ta monitorea nan salud manera hende muhe ta haci.

Mirando esaki, y e realidad cu AZV en principio ta pa cuido curativo, y cu nan no ta haci hopi riba e parti di prevencion, excepto prevencion secundario y terciario, nan a dicidi di busca apoyo di sector priva pa asina hunto nan por apoya AZV den programanan di conscientisacion.

“E proyecto Macho Crioyo na Do It Center di Shaba a nace cu e pensamento cu tur hende homber por sinti nan mes comodo den e ambiente y e ta un luga cu tur hende homber ta frecuenta,” Tchong a sigura.

Tambe tabatin diferente partner cu a participa cu e testnan, benta di producto organico y benta di cerbes ‘low calories’ pa asina conscientisa hende homber cu tin opcion tambe pa scoge un estilo di bida mas saludabel.

Joost van de Kamp di departamento di Comunicacion di AZV a señala cu na Aruba tin 5.000 hende muhe mas cu hende homber, un diferencia bastante grandi. Ora nan ta wak e cifranan di gasto medico nan ta mira cu hende muhe di 20 pa 60 aña ta haci proporcionalmente hopi mas gasto cu hende homber, loke ta nifica cu hende homber no ta bay dokter asina frecuente.

Tambe el a compara hende homber cu hende muhe for di nacemento te na fin; e prome cuatro aña e gastonan di mucha homber ta mas halto cu di mucha muhe y esey ta keda asina te 10 aña. Despues di 20 aña, gastonan di hende muhe ta subi, pa motibo di temporada cu nan ta haya yiu y nan ta frecuenta dokter hopi mas, hende homber ta keda stabiel den esaki te 40 aña.

Di mesun manera, van de Kamp a presenta cifranan di CBS di Aruba di 2010 cu ta bisa cu hende muhe ta biba mas largo cu hende homber, e expectativa di bida na Aruba ta di seis aña entre nan dos.

Algo cu ta hopi remarcabel ta e gastonan di tratamento medico den exterior, unda van de Kamp ta señala cu hende homber riba 50 aña tin hopi mas gasto, loke tambe ta refleha den e periodo cu nan ta keda den exterior cu ta mas largo, pa via cu nan situacion medico ta mas complica.

El a duna como ehempel un pashent cu ta bay haci un operacion, pero tin presion mucho halto of tin diabetes y su sucu no ta regula. Esaki ta haci e situacion hopi mas complica y tin cu regula e sucu y presion prome cu por trata e pashent. Ta p’esey tin hopi mas gasto den exterior causando un problema pa AZV, ya cu segun van de Kamp tin escasez di placa y nan tin cu cuida esey.