Minister di Turismo, Dangui Oduber su maneho di turismo ta dirigi riba calidad, diversificacion, mehoracion di servicio y mas cu obvio tambe den mehoracion di areanan turistico.
Segun un comunicado di gobierno, den cuadro di diversificacion, ya caba Oduber a percura pa diversifica nos Turismo den e area Norte Americano. Asina a logra vuelonan directo cu American Airlines for di Chicago y Dallas. E vuelo directo di Dallas ta sumamente importante pa e conexion di West Coast pa Aruba caminda Dallas ta bira un hub principal.
Banda di esaki ta trahando duro pa aumenta e cantidad di bishitantenan for di Canada y tambe diversifica e mrcado for di Europa. Aruba su cifranan pa locual ta trata bishitantenan di Hulanda ta hopi positivo y apropia pa comparti cu comunidad.
Pa e prome mita di aña 2019, Aruba a conoce un total di 21.731 mil pasahero procedente di Hulanda, cu ta posiciona su mes como e di tres mercado pa Aruba. E mercado principal, manera ya ta conoci, ta e mercado di Merca cu 575.694 mil pasahero, sigui pa esun di Canada cu 28.519 mil. E mercado Hulandes a contribui den e prome mita di 2019 cu 274.337 anochi den hotel, di cual esaki ta un crecemento di 20.8% compara cu aña 2018!
Oduber ta hopi satisfecho cu e desaroyonan positivo y record den e mercado Europeo. Diversificacion di mercado ta keda un strategia di enfoke pa Ministerio di Turismo.
Turismo ta keda nos forsa y driver principal di nos economia, e comunicado ta finalisa bisando.
