Cifra pa Gobierno nobo por traha; Bastante variacion den diferente proyeccion economico

Mientras pa e consulta pa yega na un gobierno nobo, proyeccionnan di crecemento economico ta hopi importante, e diferente proyeccionnan cu nos a mira ultimamente no ta asina uniforme. Nos a analiza e cifranan duna den diferente publicacion, parti di nan a sali den un publicacion anterior di Bon Dia Aruba di dia 4 di mei 2021.

Nan ta Memoria Explicativo di Presupuesto 2021, cu ta contene e asina yama Presupuesto Multi-anual, un exigencia di Hulanda, aunke esey no ta unico consideracion pa un pais tin uno. Tambe e publicacion Economic Outlook di Departamento di Asunto Economico, Comercio y Industria (DEACI) y e mas reciente Economic Outlook di Banco Central di Aruba (di februari 2021). E proyeccionnan di DEACI y CBA tin diferente scenario di posible crecemento (basico – optimista – pesimista) y nos a calcula a base di e porcentahenan cu nan a duna, e potencial volumen di GDP nominal den e diferente scenarionan. Tambe a haci uso di e proyeccionnan di IMF den nan rapport final di 2021 despues di nan bishita mas tempran e aña aki.

Crecemento di GDP nominal 2019-2025 (den Afl. Miyon)

Fuente: Memorie van Toelichting Begroting Aruba 2021

IMF: Executive Board Concludes 2021 Article IV Discussions with Kingdom of the Netherlands – Aruba

Departamento Asunto Economico (DEACI): Outlook 2021 – 2023

Cifra den Italic y Bold: Calculacion BDA

Manera por constata, fuera di e Meerjarenbegroting di gobierno den su presupuesto 2021, ningun otro instancia a inclui cifra di proyeccion mas leu cu 2023, loke ta parce logico mirando e situacion insigur cu nos ta aden, en vista di por ehemplo un surgimento nobo di coronavirus cu lo por afecta nos economia gravemente atrobe.

Tambe por observa cu Departamento di Asunto Economico (DEACI) ta maneha un GDP nominal pa aña 2019 cu ta bastante mas halto cu loke tanto IMF como CBA a calcula y publica. Nos no conoce trasfondo di esey y ta publica e cifranan manera nan ta aparece. E calculacion mas halto di GDP nominal 2019 automaticamente ta hiba cifra mas halto pa 2020 tambe – Afl. 4577 miyon – cu por cierto ta hopi mas halto cu loke gobierno – e mesun ministerio di finanzas y asunto economico – ta maneha den su reportahenan financiero den cuadro di cumplimento di e obligacionnan cu Reino Hulandes, cual ta un GDP di Afl. 4049 miyon. Gobierno den e promer reportahe di aña, cu ta cubri trimester 1-2021, ta maneha e cifra di Afl. 4277 di GDP nominal, cual ta e cifra cu ta aparece den presupuesto tambe.

Pa loke ta trata e cifranan di Banco Central por bsa cu nan ta mas modera, cuminzando cu nan calculacion base pa 2019, cu ta mas den linea cu loke gobierno ta usa den su presupuesto y mas abao cu e calculacion di DEACI. Ademas CBA no ta bay mas leu cu 2021 cu su pronostico. Esaki ta laga nos cu solamente un proyeccion te 2025, di gobierno, cu tin ademas e salto un poco peculiar den e cifranan di 2021 pa 2022, cu ta duna un aumento di GDP di 28% pa 2022. Di otro banda, di e mesun gobierno ta sali cifra di DEACI cu ta duna un ruta diferente, cuminzando cu cifra mas halto pa 2019, pa 2020 2021, pero despues ta presenta un imagen mas modera pa 2022 y 2023. Ta parce recomendable pa bin un recalculacion, o ta laga economia mes conta nos kico ta tumando lugar.

Resumiendo, pa 2021 e calculacionnan di GDP ta varia di Afl. 4277 miyon di presupuesto 2021, y Afl. 5077 miyon di DEACI. Pa 2022 e outlook basico di DEACI ta mas abao (Afl. 5107 miyon) y presupuesto 2021 ta esun mas halto pa 2022: Afl. 5475 miyon.