Cifra dudoso den analisis AIB

Cu bastante fanfaria atrobe a publica e partinan aparentemente clave di e rapport di Aruba Investment Bank (AIB) tocante e proyecto di rehabilitacion di e refineria. Tabata di spera (no di anticipa) cu e institucion aki lo a haci un trabao serio, profesional. Sin embargo, e resultado no ta mustra asina. Loke tampoco ta yuda cu no a publica e informe completo, sino un sintesis cu gobierno a publica. Algo diferente cu e publicacionnan di por ehemplo Banco Central cu ta publica tur cos bao di nan propio responsabilidad y completo. Di e manera aki ta bira dificil pa distingui kico e entidad aki ta bisa profesionalmente y kico ta e toke di propaganda cu gobierno ta duna na e publicacion den forma di un recado di prensa.

Pero pa bay ‘al grano’ den e contenido di loke a publica, nos ta cuminsa cu constata cu no ta bisa absolutamente nada di e riesgonan relaciona cu e situacion financiero di e empresanan na Venezuela y Merca envolvi. Esey riba su mes no ta asina straño, ya cu nan (PDVSA y subsidiarionan) a reconoce cu nan no tin capital pa inverti. Motibo pa cual a ‘invita’ e tres contratistanan, un Frances y dos Venezolano, pa nan busca financiamento, haci e trabao y cobra despues segun cu e compania ta produci. No tabatin noticia ainda con a para cu e intento aki pa yega na financiamento. Ta logico pa pensa, cu si tabatin noticia positivo cu e placa ta sigura, anto lo a anuncia esey di biaha.

Tampoco tabatin noticia positivo na Venezuela tocante financiamento pa e proyectonan na Venezuela unda ta purba financia cu e mesun modelo y den cual e mesun companianan contratista aki tabata envolvi caba, prome cu e idea a surgi pa aplica e modelo na Aruba tambe. ‘Time will tell’ con esaki lo bay. En todo caso retraso den percura pa financiamento lo trece retraso tambe den e momento cu por inicia cu e trabaonan di rehabilitacion y lo tin consecuencia pa caha di gobierno inmediatamente: menos loonbelasting, menos prima social y medico, menos importacion.

E otro aspecto cu a capta nos atencion ta e cifranan presenta di e beneficionan cu por spera pa gobierno y e fondonan social/medico (SVb; AZV) di nos pais. Pa loke ta impuesto riba salario, AIB ta calcula cu na aña 2017 lo drenta un suma extra di Afl. 58,7 miyon. Esaki ta hopi, tiki, kico? Pa compara, nos ta tuma e datonan general di kico en total ta drenta na loonbelasting anualmente. E ultimo cifra disponibel ta di 2015 di Banco Central y ta papia di Afl. 247,6 miyon. Segun e rapport di gobierno entrega na parlamento y CAFT na final di tres kwartaal di 2016 ta indica cu 2016 por ta un poco mas halto cu e cifra di 2015 aki. Digamos cu e ta na Afl. 260 miyon. E relato di prensa di gobierno/AIB ta papia di extra empleo di 3,1% di e forsa laboral. Forsa laboral ta na mas o menos 56.000 persona, anto e empleo ta 3,1 x 560= mas o menos 1750 hende. Pa un proceso di rehabilitacion esaki riba su mes ta un cantidad creibel.

Pero… cada un di nan ta bay paga como promedio 58,7 miyon: 1750= Afl. 33.500,- na loonbelasting?? Pero no ta gobierno mes a laga sa cu e promedio di salario na Citgo lo ta Afl. 52.000 pa aña? Pa bo yega na cobra 58,7 miyon na loonbelasting, bo mester por tin un suma total di salario bruto di como 400 miyon! Nos ta mira esey den e lista di inversion? Mira di otro angulo: 3,1% di e forsa laboral ta bay percura pa casi 20% di loonbelasting pa 2017, si nos calcula e 58,7 miyon den e suma total cu lo drenta, cual lo ta algo mas di 300 miyon. Creibel?

Realmente nos no mester di analisa mas aleu kico e ekipo aki a produci. Aña pasa september Banco Central tabata calcula cu na 2017 e aportacion na nos economia lo ta mayoritariamente salario pa empleado y tabata calcula esey riba 7 miyon pa e ultimo lunanan di 2016 y na 22 miyon florin pa 2017.  Awor AIB ta mustra cifra di mas di dobel e cantidad aki na loonbelasting. E cifranan pa SVb y AZV ta mustra nos cu e pagonan di dunado di trabao ta suma na mas di 100 miyon florin pa aña 2017. Esey ta implica berdad cu mester tin un payroll di 300 – 400 miyon florin, cu reparti riba 1750 persona ta duna e salario promedio exagera di mas di 100.000 florin pa persona.

Nos no por yega na otro conclusion cu e manera di traha aki no ta parce profesional y por ta fruto solamente di un afan ciego pa complace e actual gobierno cu a pone henter su alma den e proyecto aki. No comprende nos malo, si e proyecto haya financiamento y nan emplea e hendenan cu nan mester, e ta un ‘boost’ pa economia. Loke nos no mester ta e tipo di exageracion aki pa purba convence hende.