Manera un ‘berguensa nacional’ ex minister di Husticia y actual parlamentario, Arthur Dowers (AVP) a cualifica e declaracion cu prome minister di Aruba, Evelyn Wever-Croes (MEP) a duna na un medio Hulandes riba e situacion cu a surgi cu Venezuela, pero particularmente riba e cantidad di ilegal Venezolano riba nos isla.
Segun parlamentario Dowers e declaracion duna pa e prome mandatario di Aruba ‘no ta cuadra y ta pone henter nos pais su cara na berguensa’. E mandatario a bin cu e cifra di 12 mil Venezolano ilegal na Aruba. E cifra aki di 12 mil Venezolano ilegal cu prome minister a bin cu ne den su declaracion pa prensa Hulandes ta e mesun cifra cu nan a trece cu ne tempo cu MEP tabata den oposicion y cu -segun sr. Dowers- nan a mal informa pueblo.
Ex mandatario di Husticia a trece algun cifra a base di un analisis cu nan a haci na 2015 ora e situacion na Venezuela a bira hopi dificil. E tabata e aña cu cantidad di Venezolano a bin Aruba cu maleta riba caya pa abastece nan mes di cierto producto bendi localmente tempo di e fenomeno conoci como “raspa tarheta.”
Cifranan
Na aña 2015 a drenta cu di e cantidad di 1.2 miyon turista di nan tabatin 300.787 turista Venezolano a bini di cual a mustra cu a keda 1000 Venezolano. Pa e siguiente aña 2016 alrededor di 1 miyon turista a bishita nos isla y di nan tabatin 230.149 Venezolano. E cantidad di turista cu a keda tabata apenas di alrededor di 100 turista, segun sr. Dowers. El a bisa cu e cifranan aki a wordo divulga e tempo aya den prensa.
Na januari 2016 mayoria di turista cu a keda a sali over na e luna aki, ya cu e ta un luna unda mas turista a sali di loke nan ta drenta. E ta calcula cu cada aña alrededor di 1 mil hende cu a drenta como turista a keda riba nos isla. Pero tampoco por bisa cu e hendenan aki ta ilegal actualmente, ya cu eventualmente nan por a drenta como turista y despues nan ta haya un permiso of un extension di nan estadia como turista. E contamento aki ta basa riba 30 dia y tin biaha nan ta haya 90 dia pa permanece como turista. E ta considera cu e cifranan aki ta uno dificil pa bo compara bon. Sinembargo e cantidad di turista cu cada aña por keda na Aruba pa un periodo largo ta alrededor di mil.
P’esey e ta haya cu pa haci un analisis bon esaki mester tuma luga cada bes te cu na juli. E analisis aki te cu juli 2017 -a base di informacion di inmigracion- ta mustra cu den e luna aki a sali 2 mil Venezolano mas , ya cu poco poco nan ta saliendo.
Tambe el a indica cu e cantidad di deportacion di Venezolano a subi drasticamente for di 2015. Na 2016 tabatin un 200% di mas Venezolano deporta compara cu e aña anterior. Na 2017 e tendencia a bira mas grandi ya cu na mita di aña caba tabatin un 300% di Venezolano deporta. Igualmente el a indica cu e cifranan di personanan cu a wordo nenga pa drenta Aruba tabata 1375 Venezolano. Na 2017 e cifra compara cu 2016 e cantidad a baha, ya cu menos hende a intenta drenta nos pais sin cu nan por mustra cu tin e recursonan financiero pa nan propio bienestar na Aruba.
Segun sr. Dowers e cifra aki ta mustra con nan a implementa maneho pa maneha e situacion di e migrantenan di Venezola. P’esey e ta haya un berguensa cu e prome mandatario por a haci uzo di e cifranan aki cu ta disponibel pa analisa y haci maneho cu nan, e ta bin declara internacionalmente cu tin 12 mil Venezolano ilegal na Aruba. E conclusion cu el a bin cu ne ta cu e maneho cu nan a hiba a cuminsa demotiva e turistanan Venezolano pa bin keda. Y tambe varios di e turistanan cu a keda atras un aña anterior, un aña despues nan ta sali otro destino.
Exodo di Venezolanonan
Ademas den su declaracion pa prensa Hulandes –segun parlamentario Dowers- e mandatario Wever-Croes a expresa su intencion di facilita pa mas hende di e pais bisiña aki bin Aruba debi na e situacion inhumano cu nan ta pasando aden. Den su declaracion e ta compronde cu e gobierno actual kier facilita e refugiadonan Venezolano aki drenta nos isla y registra nan, tambe atende nan necesidadnan basico di awa cu cuminda y despues manda nan Bonaire.
“Esaki ta e cos mas bergonsoso cu mi a yega tende den reino Hulandes cu un pais cu ta un parti autonomo den reino ta dicidi awor cu e ta trece Venezolanonan na pais Aruba y manda nan na Bonaire como si fuera e ta manda na Bonaire”, asina e ex minister di husticia di e gobierno anterior a bisa.
Parlamentario Dowers haya cu esaki no ta cuadra cu un pais manera Aruba cu a traha duro pa respeta autonomia. Pero tambe respeta derecho di cada pais, y awor e prome mandatario actual ta bisa cu ta bay trece Venezolanonan na Aruba y manda nan Bonaire. E ta haya cu e asunto di asilo ta uno delicado y nan a percura pa mantene e topico aki na cierto distancia fei prensa pa no motiva niun hende, locual e ta haya cu e prome mandatario actual ta purba di motiva cu su declaracion na prensa Hulandes.
Un situacion cu -segun sr. Dowers- nan den gobierno anterior a percura di mantene controla, ya cu nan tabata trata e asunto di Venezuela regularmente, no solamente hunto cu reino Hulandes sino internacionalmente. El a revela cu durante nan dos periodo di gobernacion e asunto di Venezuela semper tabata den nan agenda. Na 2015 nan a lanta un comision cu representante di nivel halto di gobierno pa atende entre otro cu Hulanda e problematica di e pais bisiña aki, ya cu e asunto aki tin di haber tambe cu siguridad nacional.
