ORANJESTAD – Te cu e prome 9 lunanan di aña 2015, e cifranan di Chikungunya y Dengue ta abou. Esaki ta bon, pero mester sigui cu e controlnan pa asina garantisa cu esaki no subi segun Clayton Croes, trahado di e departamento GKMB.
“Nos ta haya yamadanan ta keda drenta den e departamento di GKMB pa tira un bista, en busca di cria di sangura pa elimina esakinan y alabes asina sigui conscientisa pa sigui preveni esakinan. Awa a cuminsa cay y casonan ta sigui drenta. E cifranan si no a subi, GKMB ta uza tres diferente index pa controla henter aña largo e cifranan riba nos isla. E indexnan aki ta wordo fiha pa diferente standard nan via World Health Organization (WHO) y PAHO y tur e indexnan aki, pa loke ta Aruba te ainda ta bou di e drempelnan cu nan mester ta.
A pesar cu e cifranan ta bou di control, casonan ta sigui drenta. Pa e mesun rason ta hayando ya pa añanan caba e crianan “manmade”. Esakinan ta crianan cu nos mes ta ocasiona rond di nos cas por ehempel hemchinan cu ta colecta awa di airco, scoter bou di pochi di mata y vaas nan tambe.”
Proximo lunanan
Por spera yobida pa e ultimo lunanan aki. GKMB tin diferente plan cu nan tin poni standby, segun Sr. Croes Hopi di nan ta wordo ehecuta pa fin di aña, sea ta plannan di conscientisacion den e diferente barionan, unda cu tin cria aña tras di aña y cu ta ripara cu tin casonan cu ta wordo notifica tur aña. Esakinan ta poni. Tur aña nan ta wordo ehecuta tambe. E parti di conscientisacion ta pa duna pueblo informacion kico pa haci ora awa cuminsa yobe, unda pa bay si tin problema y ken tin cu tuma contacto cun’e ora cu tin e problemanan aki lanta cabes atrobe, Sr. Croes a splica.
“E casonan ta sigui presenta cu awa para, e bon noticia ta cu ta hayando esakinan, den un sentido ta miho cu haya nan pone e doñonan di cas of negoshi na altura cu tin un problema di cria. Tin manera pa soluciona esaki y sperando cu nan ta tuma e conseho aki na un manera mas miho posibel y percura pa aplica esakinan tambe.”
E ta sigui bisa cu hopi biaha ta splica, pero e idea ta tambe pa e doñonan di cas of negoshi tuma esakinan como conseho di e profesionalnan di GKMB pa asina percura pa elimina cria na un manera permanente y di e mesun manera rebaha e chensnan pa transmision di e malesa Dengue y Chikungunya di e Sangura Aedis Aegypti. Henter aña largo, sin conta tempo di yobida aden, semper ta traha preventivo. Manera cu awa cuminsa cay, ta cuminsa traha riba e casonan cu tin mester mas atencion. Pero henter aña largo cu of sin yobida, semper tin e parti preventivo unda cu ta controla henter Aruba y tambe sigui educa pueblo con pa preveni esakinan.
Meta
Mester cuminsa haci algo pa mantene e cantidad di cria di sangura abou cu por trece casonan di Chikungunya y Dengue, esaki ta e meta di GKMB, pa sigui educa e comunidad, Sr. Croes a comenta.
E parti di haci pueblo consciente ta traha riba diferente nivel. E ta e enfoke di GKMB, pa preveni criadero cu por causa brote di e sangura Aedis Aegypti, pa asina limita e chensnan pa transmision di e malesanan aki, semper y cuando ta bisa si cu tin hopi diferente virus cu ta lanta tempo di yobida. Tin e posibilidad cu e otro virusnan cu ta wordo transmiti pa otro tipo di sangura por drenta nos isla, segun Sr. Croes.
P’esey ta bisa tur hende pa keda atento. Ora cu tin problema, of cu tin sospechoso cu hende ta pensa cu e por ta malo y por a biaha of hende den cercania cu por a biaha, ta bon pa avisa e dokter di cas, pa por tin un miho bista kico por haci, Sr. Croes a enfatisa, GKMB ta atento riba e puntonan aki. Pa loke ta departamento di Salubridad Publico, nan ta hopi atento cu e diferente malesanan cu ta circulando rond y sigur por papia di Zika cu ta un malesa cu ta pasando na Sur America. Na Aruba ainda e no ta e caso, pero sigur e tipo di malesanan asina aki ta wordo discuti caba den parti di e Vector Outbreak Team, Sr. Croes a finalisa bisando.
