E cifra 100 a bira uno emblematico pa loke ta trata e casonan positivo di coronavirus/Covid-19 na Aruba.

Ayera y durante seis dia consecutivo afortunadamente e cifra aki no a subi -segun actualisacion duna pa DVG- a pesar cu cantidad di persona a wordo getest. Esaki a haci cu tanto minister presidente, Evelyn Wever-Croes y tambe minister di Salubridad Publico, Dangui Oduber, a referi na e echo aki cu hopi satisfaccion.

For di dia 22 di april ultimo cu Aruba a conoce 100 caso positivo di Covid-19, un total di 122 persona a wordo getest, pero nan tur a resulta negativo. Di e 100 persona positivo, 73 a recupera, 25 persona ta positivo ainda cu e virus y 2 a yega di fayece. Di e total di 1625 persona cu a wordo getest, 1526 a sali negativo. Actualmente tin 37 persona den cuarentena.

Diadomingo anochi, minister presidente a bisa cu e medidanan di shelter in place y toque de queda lo sigui y tambe tur e otro medidanan ta na vigor den e tempo nos dilanti. Pasobra a pesar cu nos no ta hayando caso nobo mas, e virus t’ey ainda, y nos mester percura pa ‘nos por elimin’e completamente prome.’

El a laga sa cu e medidanan cu nan a bin cu ne ta dificil pa bo por biba cu ne, pero nan lo keda na vigor por lo pronto pa bo propio bienestar y di comunidad di Aruba. Pero e ta haya cu a yega e momento pa cuminsa un etapa nobo caminda nos mester mustra disciplina. Un etapa pa cuminsa flexibilisa algun di e medidanan, pero gradualmente.

Minister di Salubridad.
Di su banda, minister di Salubridad Publico, Dangui Oduber ta hopi satisfecho cu e resultadonan di e testnan di e ultimo dos siman.

El a bisa cu Aruba a hiba un strategia hopi agresivo di haci hopi test, identifica e casonan positivo trempan, isola e casonan positivo y percura pa tin contact tracing. Tambe nan a desaroya un app pa tin miho control y supervision di esnan cu ta den cuarentena. Tur esaki a yuda pa nos por flatten the curve y maneha e transmision, el a laga sa.

Gobierno a tuma varios medida manera lockdown, toque de queda y shelter in place pa reduci e plamamento di covid-19 den nos comunidad. Pero tambe nos hendenan a demostra un disciplina e ultimo simannan, y esaki tabata un esfuerso en conhunto.

El a bisa cu no tabata facil pa mantene tur hende paden, pero nos a haci’e pasobra nos a pone salud di nos hendenan na prome luga. “Sin salud no tin bida y sin bida no tin economia,” el a bisa textualmente.

E ultimo dianan Aruba no a conoce ningun caso positivo nobo y e ultimo 15 dianan apenas 8 caso positivo. Tin mas persona recuperando cu ta test positivo. Actualmente tin 73 persona a recupera totalmente y tin solamente 25 caso activo mas. Pues e ta considera cu nos ta bayendo hopi bon y nos tin cu tene disciplina un rato mas pa nos por bisa cu Aruba ta venciendo Covid-19.

Igualmente el a bisa cu na mes momento nos tin cu prepara nos mes pa e “normal nobo,” te ora e vacuna pa Covid-19 yega. Tanten no tin vacuna nos mester tin e disciplina pa na tur momento mantene distanciamento social, tene cuenta pa laba man frecuentemente, bon higiena y hiba un bida mas saludabel.

Un biaha mas el a gradici tur persona sin excepcion cu ta den e prome linea di cuido di salud cu ta riba pia desde e promer caso, bao di hopi tension y presion pa yuda Aruba.

El a conclui bisando cu nos ta contento cu nos ta avansando den e lucha contra Covid-19, caminda nos ta mirando e luz na horizonte. “Nos ta Arubianonan balente y orguyoso, y a pesar di e golpi cu nos a haya nos lo bini bek mas fuerte cu nunca,” el a bisa. Pronto -segun minister Dangui Oduber- nos lo cuminsa reconstrui nos pais bek pa un futuro briyante pa un y tur.