Na Aruba, ta existi diferente instancia encarga cu abuso di mucha, entre nan Bureau Sostenemi cu algun luna pasa a presenta cifranan di muchanan cu a ser abusa of maltrata desde januari di aña 2018 te luna di mei di 2019.

Maltrato infantil ta defini como un abuso y falta di atencion di cual e muchanan menor di 18 aña ta e protagonista. E ta produci ora un persona ta pone den riesgo of daña e integridad fisico di e mucha, abuso sexual, maltrato emocional ora un persona ta ataca e autoestima of bienestar emocional di e mucha y abandono di mayornan, ora nan no ta provee e mucha cu cuminda, amor, cas, educacion, entre otro.

Tur e puntonan aki lo por causa dañonan pa e salud, desaroyo of dignidad di e mucha. Hopi biaha e mucha por sinti culpabel, of cu berguensa y confusion, esey tambe ta pone den peliger e bida di e mucha.

E cifranan presenta pa Bureau Sostenemi ta mustra un cantidad preocupante di abuso tumando luga, tumando na cuenta e cantidad di habitantenan cu Aruba tin. E casonan cu a ser reporta na Bureau Sostenemi na aña 2018 a duna di conoce cu tabatin 20 caso di maltrato emocional, 154 caso di descuido emocional, 23 caso di violencia domestico, 74 caso di maltrato fisico, 91 caso di descuido fisico y 54 caso di posibel abuso sexual.

Den aña 2019 te cu luna di april, tabatin 15 caso di maltrato emocional, 73 caso di
descuido emocional, 16 caso di violencia domestico, 34 caso di maltrato fisico, 29 caso di
descuido fisico y 14 caso di posibel abuso sexual.

Siman pasa, Minister di Asuntonan Social, Glenbert Croes a haci entrega di e di dos reportahe di e Social Crisis Plan na Parlamento, den cual a duna di conoce cu 93% di e proyectonan tabata canando satisfactoriamente te cu luna di juli, cu 31 proyecto den ehecucion.

Entre nan ta e training di diferente sector pa loke ta e metodo di trabou social ‘Signs of Safety’ y tambe e proyecto di Jongerenloket, unda Departamento di Asunto Social y patrocinado ta ofrece cursonan y guia pa mas di 20 mama soltera, pa yuda nan subi mercado laboral y asina sali di e sistema di ayudo social. Diferente fundacion social tambe ta forma parti di Social Crisis Plan y ta ehecutando proyectonan specifico. Pa ley, Social Crisis Plan mester raporta cada kwartaal na Gobierno y Parlamento di Aruba.

Na nivel mundial, esaki ta un problema cu consecuencianan hopi grave cu por dura pa henter e bida di un mucha. Estudionan internacional ta revela cu un cuarta parti di adultonan a manifesta cu a sufri maltrato fisico ora nan tabata mucha, 1 di cada 5 muhe y 1 di cada 13 homber a declara di sufri abuso sexual den nan infancia, ademas di esunnan cu ta sufri di maltrato psicologico of emocional y abandono di nan mayornan.

Den ultimo aña, gobierno y ciudadnan a cuminsa bati alarma di e topico aki. No ta normal cu na un sociedad asina chikito manera Aruba, ta existi un cantidad considerabel di maltrato of abuso di mucha. Di mesun manera, tambe Polis y Departamento di Recherche a investiga y haya personanan cu tabatin vinculo cu pornografia infantil, cual a hala hopi atencion y lanta e preguntanan, pakico e personanan por yega te un situacion asina?

Henter comunidad mester kibra silencio rond di cualkier sorto di maltrato, sea pa cu mucha of hendenan adulto of grandinan. Aruba tin cu cuminsa tuma consenshi cu maltrato of abuso ta haci di e victimanan na futuro un persona vulnerabel of un cu tambe por bira abusado den edad adulto.