(AP) – Cheryl Simpson mester a celebra su hacimento di aña cu su amistadnan, pero den luga di esey a haya su mes cera den su cas na Auckland.

E descubrimento di un solo caso local di COVID-19 na New Zealand tabata suficiente pa e gobierno pone henter e pais den un ciere estricto e siman pasa aki. Mientras cu otronan ta mira esaki como extremo, e localnan di New Zealand ta apoya medidanan manera esaki pa motibo cu nan a traha sumamente bon den pasado.

“Mi ta contento di keda den cierte, aunke mi no gusta,” Simpson a bisa, dono di un centro pa cuida cacho, cu aworaki ta cera pa motibo di e precaucionnan. El a bisa cu e kier pa e pais combati e brote recien, “mi lo kier dal e virus aki den su cabes.”

Otro caminda den Pacifico, Hapon ta resistiendo e medidanan den bista di un brote hopi mas grandi di loke tin den record, y na luga di esaki a opta pa acelera e programa di vacunacion. Y Australia tambe a cay den caminda.

Tur tres pais a pasa den e prome aña di e pandemia den un estado relativamente bon, pero aworaki ta tumando rumbo distinto den e manera cu nan ta lidiando cu e brote di e variante delta, cual ta e forma mas contagioso cu ta contribui na e sentimento cu no por deshaci ni combati e coronavirus, sino solamente maneha esaki.

Profesor Michael Baker, un epidemologo na New Zealnds Univeristy of Otago, a bisa cu e paisnan rond di mundo ta luchando pa por adapta na e menasa actual aki, “cu e variante delta aki, e reglanan bieu no ta bay funciona.”

E diferencia den rumbo y strategia di ciere versus vacuna, y con efectivo e strategianan aki ta comproba di ta den combati e variante delta, por a yega consecuencianan hopi mas leu di loke e paisnan aki su economia y residentenan su salud por a premira of wanta.

Hapon nunca a impone ciere pa causa di e coronavirus. E publico ta paga hopi tino na e gobierno su decisionnan despues di e pais su periodo fascista prome y durante e di dos guera mundial, y Hapon su constitucion despues di e guera ta pone proteccionnan estricto riba libertadnan civil.

Prome cu e variante delta, e pais a logra di mantene un control riba e brote di coronavirus den parti pa motibo cu hopi hende den Hapon ya tabata custuma di bisti tapaboca pa proteccion di alergianan y ora cu nan tabatin griep.

Awo, casi tur hende riba transportacion publico ta bisti tapaboca durante orarionan comun. Pero laat anochi, hende tin e custumber di kita e tapaboca den restaurantnan y bar, unda cu e chens ta bini pa e variante por plama. E hecho cu e Olimpiada na Tokyo a caba di tuma luga no ta yuda tampoco.

Mientras cu protocolnan estricto a mantene e infeccionnan dentro di e Olimpiada na un minimo, expertonan manera DR. Shigeru Omi, un consehero medico clave pa e gobierno, a bisa cu e Olimpiada a crea un aire festivo unda cu e localnan di Hapon a baha nan guardia.

Casonan nobo na Hapo e luna aki a aumenta na casi 25,000 pa dia, casi mas di e tripel durante e brotenan anterior. Omi ta considera esaki un desaster.

Prome Minister Yoshihide Suga riba diabierna a expandi y a extende e estado di emergencia cubriendo Tokyo y otro areanan te cu por lo menos mita di september, aunke mayoria di e restriccionnan no por ser legalmente reenforsa.

Hopi gobernador ta urgiendo e prome minister pa considera medidanan hopi mas estricto. Pero Suga a bisa cu cierenan ta ser critica mundialmente, y vacunacion ta “e unico manera cu por combati esaki.”

Vacunacionnan diario den Hapon a aumenta tres biaha di lo normal desde mei pa juni, den bista cu miles di luganan di trabao y scolnan a cuminsa ofrece e vacuna, pero un comienso slow a laga e nacion cu hopi retraso den vacunacion. Solamente 40% di e personanan ta completamente vacuna.

Den Australia, un brote di delta a cuminsa na Sydney den juni, despues cu un chofer di limousine sin su vacuna a ser infecta despues di a transporta un ekipo di U.S Cargo for di Sydney Airport. E autoridadnan di e estado a tarda mas o menos 10 dia prome cu a tuma e decision di impone un ciere den Sydney, cual awo tin casi 2 luna den efecto.

Anteriormente, den comienso di e pandemia, Australia su gobierno federal a impone un solo siere den e nacion. Awo, den bista di e brote di delta, e ta persiguiendo un strategia mas agresivo, incluyendo control estricto riba e Australianonan cu ta sali for di e pais, y e stranheronan cu ta drentando e pais. Pero generalmente, ta lagando e lidernan di e estadonan tuma e decisionnan.

Infeccionnan nobo na Sydney a subi di solamente algun pa siman, na casi mas di 800 pa dia despues di e brote actual.

“E no ta posibel pa elimina e virus aki completamente. Nos tin cu siña con pa biba cu e virus aki,” Gladys Berejiklian, e premier di Sydney su New South Wales, a bisa cu den loke hopi a interpreta como un retiro significante di e determinacion di e lidernan di estado a mustra anteriormente cu e ta derota e brotenan aki completamente.

“Esaki ta e motibo dicion nos tin un strategia dobbel den New South Wales,” Berejiklian a bisa. “Nos mester baha e number di e casonan aki, y subi e cantidad di vacunacion. Nos tin cu logra tur dos pa nos por biba un bida liber den futuro.”

E brote den Sydney a sigui bay den e capitcal, Canberra, cual tambe a drenta un ciere. Empleado di gobierno Maitina Carbone a bisti un tapaboc a mientras cu e tabata haciendo compras riba diabierna.

“Mi no sa si algun persona of pais lo por combati delta,” el a bisa. “Mi ta kere nos tin cu purba di aumenta nos cantidad di vacunacion, y poco poco cuminsa habri bek na momento cu nos sinti e ta sigur pa haci esaki.”