(NLTimes) – E medidanan y restriccionnan actual pa cu coronavirus lo keda extendi por lo menos te cu 1 di januari, fuentenan cerca di e Gabinete a conta NOS.

E restriccionnan aki inicialmente mester a keda reevalua e diamars aki, cu e expectativa cu nan lo a ser extendi te cu dia 18 di december. Ningun decision a ser haci tocante e posibilidad di extende e vakantie di winter cual lo cuminsa dia 24 di december.

E decision pa extende e ciere nocturno a ser haci cu e conseho di e Outbreak Management Team, cual varios miembro di e Gabinete a delibera hunto riba diadomingo atardi. Henter e gabinete lo consulta e topico prome cu un decision final ser haci. E extension di e politica ta premira di ser anuncia pa Prome Minister Mark Rutte y Minister di Salud Hugo de Jonge durante un conferencia pa prensa riba diamars.

Hendenan na Hulanda lo mester sigui biba cu e orario di ciere trempan di nan barnan faborito y restaurant druk durante e periodo di vakantie si e ciere keda extendi. Henter e industria di hospitalidad actualmente tin cu cera 5pm. Mesun reglanan ta aplica pa casi tur otro localidad di negoshi, arte y cultura den e pais.

Adicionalmente, no lo tin cambio na e cantidad maximo di persona cu ta permiti pa dia na hogarnan, te hasta riba dianan festivo manera pasco, fin di aña y aña nobo. E Gobierno a comparti un conseho “urgente” cu no mas di 4 bishitante riba e edad di 12 ta permiti di ta den e mesun cas pa dia. No tin limite na e cantidad di bishita bao di e edad aki.

E unico excepcionnan te cu awo pa tiendanan esencial, manera supermarket y botica, cual tin permiso di keda habri te cu 8or di anochi. Servicionan esencial manera notario, abogado, profesionalnan medico y consehero di hypotheek por mantene nan orarionan normal.

E medidanan aki a drenta den vigor 14 dia pasa, den medio di yamadanan pa restriccionnan mas fuerte mirando cu e pais tabata lidiando cu un averahe di 22,500 infeccion di coronavirus pa dia. E cifra aki a baha cu 18 porciento desde cu e medidanan aki a keda implementa, pero e variante omicron actualmente a cuminsa plama den e pais cu oficialnan insigur di con esaki lo afecta e cantidad di infeccionnan di awor en adelante.

Unidad di cuido intensivo tabata tratando 551 pashent di COVID-19 riba dia 28 di november. E cifra aki a aumenta te cu 662 riba diadomingo incluyendo 20 den hospitalnan Aleman. Pashentnan den cuido regular tabata mas stabil, aumentando di 2,091 te cu 2,120.