(AP) – Cientificonan ta usando stem celnan humano pa crea un structura cu ta imita un pre-embryo y por sirbi como alternativa investigativo pa uno real.
Nan ta bisa cu e ‘blastoid’nan aki ta provee un forma eficiente y etico pa studia desaroyo humano y por busca descubrimentonan biomedico den fertilidad y anticoncepcion.
E esfuerso mas recien tabata detaya diahuebs den e journal Nature. E structuranan no ta embryo, pero cientificonan sinembargo no a laga nan crece mas cu dos siman den deferencia na guianan etico.
Un blastoid ta un modelo pa un blastocyst, un bala di celnan cu ta forma dentro di un siman di fertilisacion y cu ta mesun hancho cu un cabey. Nicolas Rivron, investigador na Academia di Ciencia di Austria, y un di e autornan den e documento di Nature, a bisa cu e modelonan ta ‘un alternativa fantastico’ pa embryonan humano pa investigacion, en parti pasobra embryonan dona ta dificil pa haya y manipula den laboratorio.
“Ta extremadamente dificil pa usa embryonan humano asina y descubri algun molecule, genes, principionan cu por permiti nos compronde miho desaroyo, y tambe haci descubrimentonan biomedico”, Rivron a bisa.
Pero substitutonan crea den laboratorio por ser traha, altera y studia den cantidadnan grandi, y por complementa investigacion embryonico, el a bisa. “Esaki ta desata e potencial pa descubrimentonan cientifico y biomedico”, el a bisa. Por ehemplo, loke investigadornan ta siña studiando blastoidnan por ser usa pa desaroya anticonceptivonan cu no ta inclui hormoonnan.
Esaki no ta prome biaha cu cientificonan a crea un blastoid humano, segun Magdalena Zernicka-Goetz, un experto den biologia di stem cel na Universidad di Cambridge y kende no tabata involucra den e studio mas recien, a nota. Pero ‘tur stap ta significante’, mehorando eficiencia mientras investigadornan ta purba di domina e modelo, el a bisa.
Pa crea e blastoidnan, Rivron y su coleganan a usa dos diferente tipo di stem cel: sea stem celnan embryonico di lineanan celular pre-estableci, of stem celnan reprograma di celnan adulto, manera celnan di cuero. No a traha lineanan di cel embryonico pa e investigacion.
Den futuro, e stem celnan reprograma for di celnan adulto probablemente ta bay converti den e standard nobo den investigacion, el a bisa, pero lineanan di celnan embryonico estableci ta necesario awo pasobra nan ‘ainda ta e ultimo referencia’. El a bisa cu blastocyst a wordo cultura separa pa compara nan cu structuranan crea den laboratorio.
E estudio a mustra cu blastoidnan confiablemente a replica fasenan clave di desaroyo trempan di embryo. Unda a pone nan den contacto cu celnan di e bekleding di utero cu a stimula cu hormoonnan, alrededor di mita a mara su mes y cuminsa crece den e mesun forma cu blastocyst lo haci.
Rivron a bisa cu investigadornan a stop e crecemento despues di 13 dia y a analisa e celnan. Na e punto ey, el a bisa, e coleccion di cel no a refleha un embryo di 13 dia; nan no tabata creciendo suficiente of organisando mesun bon.
El a bisa cu preocupacionnan etico tambe a bin den consideracion: Durante decadanan, e ‘regla di 14 dia’ pa crecemento di embryo den laboratorio a guia investigadornan. E aña aki, Sociedad Internacional pa Investigacion di Stem Cel a recomenda relaha e reglanan bao circunstancianan limita.
Rivron, parti di e grupo di trabao cu a actualisa e guianan di e sociedad, a bisa cu blastoidnan no ta suheto na e mesun regla, pero a destaca cu e guianan ta bisa cu nunca mester transferi esakinan den un animal of humano.
“Ta hopi cla cu e blastoidnan no ta embryo… y si nan no ta, e ora pakico nos ta bay aplica e regla di 14 dia na e structuranan aki?”, el a bisa. Sinembargo, nan a dicidi pa stop ‘den interes di transparencia y pa sigura cu cosnan ta bon comprendi pa publico’.
Dr. Barbara Golder, hefe di edicion di The Linacre Quarterly, e journal di Asociacion Medico Catolico, a bisa cu e desaroyo di blastoids ta mustra ‘con ciencia ta bay dilanti’. Pero, el a bisa, ta problematico cu lineanan di cel embryonico ta keda e standard den ciencia.
